الاسد نے شامی عوام کے ساتھ بات چیت کے موقع سے فائدہ نہیں اٹھایا: قطری وزیرِاعظم

قطر کے وزیرِ اعظم نے ہفتے کے روز کہا کہ شام کے صدر بشار الاسد اپنے لوگوں کے ساتھ بات چیت کرنے اور جنگ میں ایک پرسکون وقفے کے دوران مہاجرین کی واپسی جیسے مسائل حل کرنے میں ناکام رہے۔

شیخ محمد نے سیاسی مکالمے کے لیے دوحہ فورم میں کہا، "الاسد نے اپنے لوگوں کے ساتھ بات چیت اور ان سے اپنے تعلقات بحال کرنے کے مواقع سے فائدہ نہیں اٹھایا اور ہم نے کوئی سنجیدہ کوشش نہیں دیکھی خواہ وہ پناہ گزینوں کی واپسی کے حوالے سے ہو یا اپنے لوگوں کے ساتھ مفاہمت۔"

قطر شامی رہنما کا شدید ناقد ہے لیکن وہ مذاکرات کے ذریعے لڑائی کے خاتمے کا مطالبہ کر رہا ہے۔

شیخ محمد نے کہا کہ شام میں حزبِ اختلاف کے مسلح گروہوں کی حالیہ تیز رفتار پیش قدمی سے دنیا کو "حیرانی" ہوئی ہے اور انہوں نے خبردار کیا کہ صورتِ حال "زیادہ سے زیادہ خطرناک" ہو سکتی ہے جس سے خانہ جنگی میں دوبارہ مزید شدت پیدا ہونے کا خطرہ ہے۔

انہوں نے مزید کہا، وہاں جو کچھ ہو رہا ہے، اگر اس کا سیاسی حل تلاش کرنے کے لیے ایک سیاسی لائحہ عمل جلد شروع کرنے کا کوئی احساس نہیں ہے تو اس طرح کا نتیجہ "جو بچا ہے اسے نقصان پہنچائے گا اور تباہ کر دے گا۔"

مسلح حزبِ اختلاف کی تیز رفتار پیش قدمی کے بعد شام پر متوقع مذاکرات کے لیے ترکی، ایران اور روس کے وزرائے خارجہ ہفتے کے روز دوحہ میں موجود تھے۔

یہ تینوں طاقتیں آستانہ امن عمل میں شامل تھیں جو 2017 میں شام کی خانہ جنگی کے خاتمے کے مقصد سے شروع ہوا تھا اور ان کی دوحہ فورم کے دوران قطری دارالحکومت میں موجودگی متوقع ہے۔

اتحادی دوحہ کے ساتھ انقرہ تاریخی طور پر شام میں بعض حکومت مخالف قوتوں کی حمایت کرتا رہا ہے جبکہ ماسکو اور تہران الاسد کے اہم اتحادی ہیں جو بغاوت کو کچلنے کی ان کی کوششوں کی حمایت کرتے ہیں۔

روس اور ترکی نے شام کے شمال مغربی علاقے ادلب میں 2020 کی جنگ بندی کی ثالثی کی تھی جو اُس وقت ملک میں مسلح اپوزیشن کا آخری بڑا مضبوط مقام تھا۔