جان پر کھیل کر آگ کے شعلوں میں گھری گاڑی سے زخمی کو بچانے والے نوجوانوں کی تحسین

سعودی عرب کے علاقے باحہ کی تحصیل قلوہ میں پانچ نوجوانوں نے غیر معمولی جرأت کا مظاہرہ کرتے ہوئے ایک نوجوان کو اس کی حادثے کا شکار ہونے والی گاڑی سے اس وقت زندہ نکال لیا جب گاڑی شدید آگ کے شعلوں کے لپیٹ میں تھی۔اس ہولناک ٹریفک حادثے میں تین افراد موقع پر ہی جاں بحق ہو گئے، جبکہ چوتھے نوجوان کو ان نوجوانوں نے آگ کی لپیٹ میں آنے سے پہلے بچا لیا۔

حادثہ فجر کے وقت مسجد عبداللہ راشد کے قریب پیش آیا جہاں یہ نوجوان نماز کے انتظار میں موجود تھے۔ اسی دوران ایک گاڑی اچانک بے قابو ہو کر راستے سے ہٹ کر الٹ گئی جس کے نتیجے میں اس میں آگ بھڑک اٹھی۔

ریسکیو کارروائی میں حصہ لینے والے محمد عیظہ الزرعی نے بتایا کہ "ہم فوراً دوڑ کر گاڑی کی طرف گئے، دروازے کھولنے کی کوشش کی اور اندر سے ایک نوجوان کی مدد کی آواز سنی۔ میں نے زبردستی پچھلا دروازہ کھولا اور جیسے ہی ہم اسے نکالنے لگے، گاڑی دھماکے سے پھٹ گئی۔ میرے چہرے، ہاتھوں اور ٹانگوں پر جلنے کے زخم آئے، لیکن ہم رکے نہیں بلکہ ریسکیو کی کوشش جاری رکھی"۔

اس خطرناک آپریشن میں ان کے ساتھ فیصل حسن، سلمان موسیٰ، ماجد عبداللہ اور سعید عطیہ الزہرانی بھی شامل تھے، جنہوں نے زخمی نوجوان کو گاڑی سے نکال کر محفوظ مقام تک پہنچایا، جس کے بعد آگ نے گاڑی کو مکمل طور پر لپیٹ میں لے لیا۔

حادثے میں تین افراد زندگی کی بازی ہار گئے، مگر چوتھے کی جان اللہ کے کرم اور ان نوجوانوں کی بے مثال بہادری سے بچ گئی۔

قلوہ کے شہریوں، میڈیا اور مختلف اداروں کی جانب سے ان نوجوانوں کے اس انسانیت سے بھرپور اور جرأت مندانہ اقدام کو خوب سراہا گیا ہے۔