یورپی یونین نے غزہ تک امدادی رسائی میں توسیع کے لیے اسرائیل کے ساتھ معاہدہ کیا ہے: کالاس

یورپی یونین نے جمعرات کو اسرائیل کے ساتھ غزہ تک امداد کی رسائی میں توسیع کے لیے ایک معاہدہ کیا ہے جس کے تحت خوراک کے مزید ٹرک علاقے میں داخل ہوں گے اور اضافی راہداریاں کھولی جائیں گی، یہ بات بلاک کی اعلیٰ سفارت کار نے کہی۔

یورپی یونین کے خارجہ امور کی سربراہ کاجا کالاس نے ایکس پر لکھا، "آج ہم نے اسرائیل کے ساتھ غزہ تک انسانی ہمدردی کی رسائی میں توسیع کے لیے ایک معاہدہ کیا ہے"۔

انہوں نے مزید کہا، "اس معاہدے کا مطلب ہے مزید راہداریاں کھلنا، امدادی اور غذائی ٹرکوں کا غزہ میں داخلہ، اہم انفراسٹرکچر کی مرمت اور امدادی کارکنان کا تحفظ۔ ہم اسرائیل پر اعتماد کرتے ہیں کہ وہ ہر متفقہ اقدام پر عمل درآمد کرے گا۔"

ایک بیان میں کالاس نے کہا، اسرائیل کے اتفاق کردہ اقدامات "آئندہ دنوں میں نافذ ہوں گے جن کے مطابق امداد براہِ راست آبادی تک پہنچائی جانی چاہیے۔"

انہوں نے کہا، ان اقدامات میں "غزہ بھیجی جانے والی خوراک اور غیر غذائی اشیاء کے ٹرکوں کی روزانہ تعداد میں خاطر خواہ اضافہ، شمالی اور جنوبی دونوں علاقوں میں کئی مزید راہداریاں اور اردن اور مصر سے راستے دوبارہ کھولنا" شامل ہے۔

بیان میں کہا گیا، "ان فوری اقدامات پر تیزی سے عمل درآمد کو یقینی بنانے کے لیے یورپی یونین انسانی ہمدردی کے تمام متعلقین، اقوامِ متحدہ کی ایجنسیوں اور زمین پر موجود این جی اوز کے ساتھ ہم آہنگی کے لیے تیار ہے۔"

یہ اقدام ایسے وقت میں سامنے آیا ہے جب اسرائیل اور حماس کے درمیان جنگ بندی معاہدے کی تفصیلات کا طے ہونا بدستور باقی ہے۔

غزہ میں اسرائیل کے اقدامات کی وجہ سے یورپی یونین کے اس سے تعاون کے معاہدے کی خلاف ورزی ہوئی ہے جس کے بعد اسرائیل کے خلاف اقدامات کرنے پر غور کر رہی ہے۔

لیکن 27 ملکی بلاک کو ان اقدامات پر اتفاقِ رائے حاصل کرنے کے لیے جدوجہد کا سامنا ہے کیونکہ یہ اسرائیل کے کٹر حامیوں اور فلسطینیوں کی حمایت کرنے والے ممالک کے درمیان تقسیم ہے۔