سعودی ولی عہد نے خون عطیہ کرنے کی قومی مہم کا آغاز کر دیا

سعودی پریس ایجنسی (ایس پی اے) نے جمعرات کو اطلاع دی کہ سعودی ولی عہد شہزادہ محمد بن سلمان نے خون کے عطیہ کی سالانہ مہم میں خون کا عطیہ دیا۔ اپنے اس عمل سے انہوں نے معاشرے کے تمام افراد کو خون کا عطیہ دینے میں شرکت کی ترغیب دی۔

ایس پی اے نے کہا کہ اس اقدام کا مقصد رضاکارانہ طور پر خون عطیہ کرنے کے روئیے کو فروغ دینا اور شعبہ صحت کی قومی کوششوں میں معاونت کرنا ہے۔ اس طرح 100 فیصد رضاکارانہ عطیہ دہندگان تک پہنچنا ہے تاکہ سعودی ویژن 2030 کے ایک مقررہ مقصد کے تحت جامع صحت کا حامل ایک متحرک معاشرہ تعمیر کیا جائے۔

یہ مہم مملکت کی قیادت کے دیگر انسانی اقدامات کے بعد متعارف کروائی گئی ہے بشمول عوامی طور پر کووڈ-19 ویکسین حاصل کرنا اور شاہ سلمان کے اعضاء عطیہ کرنے کے پروگرام میں رجسٹریشن۔

یہ مہم خون کے رضاکارانہ عطیہ کی اہمیت کے بارے میں آگہی پیدا کرنے اور خون اور اس کے اجزاء میں خود کفالت حاصل کرنے کے لیے ہے تاکہ مملکت کے طول و عرض میں مریضوں کے لیے خون کی محفوظ اور پائیدار فراہمی یقینی ہو۔ ایک شخص کے عطیہ کرنے سے خون، پلازما یا پلیٹلیٹس فراہم کرکے زندگیاں بچائی جا سکتی ہیں۔