سعودی عرب میں عسکری اخراجات کی مقامی صنعت کاری میں 24.89 فیصد اضافہ

سعودی عرب کی جنرل اتھارٹی برائے فوجی صنعت "جامی" نے بتایا ہے کہ گذشتہ سال کے آخر تک فوجی خرچ کی مقامی سطح پر سرمایہ کاری میں اضافہ ہوا ہے اور اس کی شرح 24.89 فیصد تک پہنچ گئی۔

اتھارٹی کے مطابق فوجی خرچ میں مقامی مواد کی موجودگی تقریباً 40.74 فیصد رہی اور یہ اضافہ شعبے میں سرمایہ کاری کے بڑھنے اور کمپنیوں کی صنعتی صلاحیتوں کے فروغ کی بدولت ممکن ہوا جو صارفین کی طلب کو پورا کرتی ہیں۔

سعودی فوجی صنعت کی اتھارٹی نے کہا کہ متعلقہ اداروں نے مقامی کمپنیوں کو ضروریات پوری کرنے کا اہم موقع فراہم کیا۔ "جامی" کا مقصد ہے کہ 2030 کے ویژن کے مطابق فوجی خرچ کی مقامی سرمایہ کاری 50 فیصد سے زیادہ ہو جائے۔

جنرل اتھارٹی کے گورنر انجینئر احمد العوهلی نے فوجی صنعت کے پہلے سالانہ اجلاس سے خطاب میں کہا کہ اتھارٹی کی حکمت عملی اور ادارہ جاتی پالیسی "فوجی صنعت" کو مضبوط مقامی شعبہ بنانے پر مرکوز ہے، جس سے قومی سکیورٹی، ترقی اور اقتصادی فوائد حاصل ہوں گے۔

انہوں نے اجلاس میں کہا کہ حکومتی اداروں کے ساتھ ہم آہنگی کے تحت اتھارٹی نے صنعتی اور دفاعی صلاحیتوں کی ترقی اور استعداد بڑھانے پر کام کیا، جس سے مقامی صنعتی شعبے میں ملازمتیں پیدا ہو رہی ہیں، قومی سکیورٹی مضبوط ہو رہی ہے اور سرمایہ کاری کے مواقع بڑھ رہے ہیں۔

اتھارٹی کے سربراہ نے کہاکہ "کسی بھی صنعت کی کامیابی بڑی حد تک مضبوط اور متنوع سپلائی چین پر منحصر ہے۔ ہم نے چھوٹے اور درمیانے درجے کے کاروباروں کی حوصلہ افزائی کی، جس سے صنعتی صلاحیتوں کی سپلائی چین کو فعال بنانے کا منصوبہ مضبوط ہوا"۔