’ مکہ بس سروس‘ کا نیا روٹ، مسجد الحرام کو حراء ثقافتی ڈاریکٹوریٹ سے جوڑ دیا گیا

مکہ مکرمہ کے پبلک ٹرانسپورٹ منصوبے ’مکہ بس سروس‘ نے ایک نیا روٹ شروع کر دیا ہے جو مسجد الحرام کو حراء کلچرل ڈاریکٹوریٹ سے جوڑتا ہے۔ اس اقدام کا مقصد مکہ مکرمہ میں دینی اور ثقافتی مقامات کے درمیان منظم رابطے کو فروغ دینا اور زائرین اور معتمرین کے لیے ایک مؤثر اور قابلِ اعتماد عوامی سفری نظام کے تحت آمد و رفت کو آسان بنانا ہے۔

نئے روٹ کے ذریعے حراء ثقافتی ڈاریکٹوریٹ تک براہِ راست رسائی ممکن ہو گئی ہے جو مکہ مکرمہ کی نمایاں ثقافتی اور علمی منزلوں میں شمار ہوتا ہے۔ اس ضلع میں وحی میوزیم، قرآن کریم میوزیم اور متعدد فکری و تعلیمی سہولیات موجود ہیں جبکہ یہ راستہ غارِ حراء تک بھی جاتا ہے۔ یوں زائرین کو وحی کے پس منظر اور آغازِ رسالت سے جڑی ایک جامع علمی تجربہ حاصل ہوتا ہے۔

یہ نیا روٹ ’مکہ بس‘ کے مسلسل توسیعی منصوبے کا حصہ ہے۔ اس وقت یہ نیٹ ورک 12 روٹس پر مشتمل ہے جہاں 400 بسیں 431 اسٹیشنوں کے ذریعے 580 کلومیٹر کے رقبے پر خدمات انجام دے رہی ہیں۔ سعودی خبر رساں ایجنسی ’ایس پی اے‘کے مطابق مکہ بس کے آغاز سے اب تک 40 لاکھ سے زائد سفری دوروں کے دوران 18 کروڑ 80 لاکھ سے زیادہ مسافروں کو منتقل کیا جا چکا ہے۔

نئے روٹ پر عمل درآمد اس ٹرانسپورٹ نظام کے تحت کیا گیا ہے جس کی نگرانی مکہ مکرمہ اور مشاعر مقدسہ کی رائل کمیشن کر رہا ہے۔ اس نظام کی قیادت جنرل ٹرانسپورٹ سینٹر کر رہا ہے جو مکہ مکرمہ میں ٹرانسپورٹ کی منصوبہ بندی، تنظیم اور آپریشن کا مرکزی ادارہ ہے۔ یہ ادارہ سفری منصوبوں کو زائرین اور معتمرین کی ضروریات سے ہم آہنگ بنانے پر کام کرتا ہے تاکہ گورننس کو مضبوط اور اہم مقامات کے درمیان رابطے کی صلاحیت کو بہتر بنایا جا سکے۔

مسجد الحرام کے مرکزی علاقے کو حراء کلچرل ڈاریکٹوریٹ سے جوڑنا مکہ مکرمہ کے اندر ٹرانسپورٹ نظام کے باہمی انضمام کو مزید مضبوط بناتا ہے۔ اس کے ذریعے ایک اہم ثقافتی اور علمی مقام تک آسان اور منظم رسائی میسر آتی ہے جو زائر کے مجموعی تجربے میں ثقافتی اور فکری پہلو کو شامل کرنے کی اسٹریٹجک سمت کی عکاسی کرتی ہے اور مقدس شہر میں دینی مقامات اور فکری منزلوں کے درمیان سفر کو مزید بہتر بناتی ہے۔