ایران کی طرف سے مظاہرین پر تشدد ایرانی کمزوری کا اظہار ہے : جرمن چانسلر

جرمنی کے چانسلر فریڈرک میرز نے ایران میں مظاہرین کے خلاف سیکیورٹی فورسز کے استعمال کو ایران کی کمزوری قرار دیتے ہوئے کہا ہے کہ ایرانی حکومت مظاہرین کے خلاف جبر و تشدد سے کام لے رہی ہے اور حد سے بڑھ کر طاقت کا استعمال کر رہی ہے جو درحقیقت ایران کی کمزوری کا اظہار ہے۔

چانسلر نے کہا ہم اس جبر و تشدد کی مذمت کرتے ہیں اور ہر اس طریقے سے مذمت کرتے ہیں جو بھی اس کے لیے ضروری ہے۔ انہوں نے ان خیالات کا اظہار بھارتی دورے کے موقع پر کیا اور کہا تشدد کا راستہ اختیار کرنا قوت کا اظہار نہیں ہوتا۔ بلکہ کمزوری کا اظہار ہوتا ہے۔

جرمن چانسلر نے زور دے کر کہا کہ اس ایرانی تشدد کو لازما ختم ہونا چاہیے۔ ادھر برلن میں وزارت خارجہ کے ترجمان نے ایران کی صورتحال پر گفتگو کرتے ہوئے کہا ہے کہ جرمنی مسلسل یہ کوشش کر رہا ہے کہ ایرانی پاسداران انقلاب کور کو یورپی یونین دہشت گرد قرار دیتے ہوئے ایرانی رجیم پر پابندیاں عائد کرے۔

ترجمان نے ایران میں انٹرنیٹ کی بندش کی بھی مذمت کی جو مظاہرین کی سوشل میڈیا تک رسائی روکنے کے لیے شروع کی گئی ہے۔

جرمن ترجمان کا کہنا تھا یہ انٹرنیٹ کی بندش حقیقتا بنیادی حق آزادی اظہار اور اطلاعات پر بھی پابندی ہے۔ لوگوں کو یہ حق حاصل ہے کہ وہ اجتماع کریں یا احتجاج کے لیے سڑکوں پر آئیں ۔ یہ انسانوں کا بنیادی و مسلمہ حق ہے۔

انہوں نے کہا ایسے تمام اقدامات جو انٹرنیٹ کی بحالی کے لیے کیے جائیں گے، جرمنی ان کا خیر مقدم کرے گا۔