وزیرِ اعظم بنجمن نیتن یاہو نے جمعرات کے روز کہا ہے کہ"جہاں بھی ضروری ہو"، اسرائیل ایران کی حمایت یافتہ حزب اللہ پر حملے جاری رکھے گا۔ اس سے ایک دن پہلے لبنان پر مہلک اسرائیلی حملہ کیا گیا۔
نیتن یاہو نے اپنے ذاتی ایکس اکاؤنٹ پر کہا، "ہم طاقت، درستی اور عزم کے ساتھ حزب اللہ پر حملہ جاری رکھے ہوئے ہیں۔"
"ہمارا پیغام واضح ہے: جو بھی اسرائیلی شہریوں کے خلاف کارروائی کرے گا - ہم ان پر حملہ کریں گے۔ ہم حزب اللہ کو نشانہ بناتے رہیں گے جہاں بھی ضروری ہو جب تک ہم اسرائیل کے شمال کے باشندوں کی سکیورٹی مکمل طور پر بحال نہ کر دیں،" انہوں نے مزید کہا۔
دریں اثنا اسرائیلی فوج نے کہا ہے کہ وہ جنوبی لبنان میں زمینی کارروائیاں جاری رکھے ہوئے ہے جہاں وہ مارچ کے اوائل سے حزب اللہ کے خلاف لڑ رہی ہے اور پوزیشنیں سنبھالے ہوئے ہے۔
ایک علیحدہ بیان میں فوج نے کہا کہ اس نے راتوں رات دو اہم راہداریوں کو نشانہ بنایا جو لبنان میں دریائے لیطانی کے شمال سے جنوب کی طرف نقل و حرکت کے لیے حزب اللہ کے دہشت گردوں اور کمانڈر کے زیرِ استعمال تھیں اور ان کے ذریعے ہزاروں ہتھیار، راکٹ اور لانچرز منتقل کیے گئے۔
نیز کہا کہ اس نے لبنانی مسلح گروپ کی "ہتھیاروں کی تقریباً 10 ذخیرہ گاہوں، لانچرز اور کمانڈ سینٹرز" کو نشانہ بنایا۔
لبنانی وزارتِ صحت نے کہا کہ بدھ کے روز اسرائیلی حملوں میں لبنان کو شدید نقصان پہنچا جس میں 200 سے زائد افراد ہلاک اور 1000 سے زائد زخمی ہوئے۔
لبنانی وزیرِ اعظم کے دفتر نے کہا کہ جمعرات کو "سینکڑوں بے گناہ اور نہتے شہریوں کو اسرائیلی حملوں میں نشانہ بنایا گیا جن کے شہداء اور زخمیوں کے لیے قومی یومِ سوگ ہو گا۔"
انہوں نے عوامی ادارے بند کر دینے اور پرچم سرنگوں کرنے کا حکم دیا۔
گھنٹوں بعد حزب اللہ نے کہا کہ اس نے امریکہ-ایران جنگ بندی کی خلاف ورزی پر اسرائیل کی طرف راکٹ فائر کیے جس کے ساتھ ہی صبح کے وقت شمالی اسرائیلی علاقوں میں سائرن کے کئی راؤنڈ بجتے رہے۔
یاد رہے کہ امریکہ اور ایران نے بدھ کے روز دو ہفتے کی جنگ بندی اور مذاکرات پر اتفاق کیا ہے۔ اس کا مقصد اس تنازعے کو ختم کرنا ہے جس سے پورے خطے میں ہزاروں افراد ہلاک اور عالمی معیشت بحران کا شکار ہو گئی ہے۔
