امریکہ کا بغداد کے ساتھ تعاون معطل، حکومتی اداروں پر ملیشیاؤں کی پشت پناہی کا الزام

بغداد میں امریکی سفارت خانے نے ان ملیشیاؤں کی سرگرمیوں کے بارے میں اپنی تنبیہات کا اعادہ کیا ہے جو امریکی شہریوں کو نشانہ بنانے کی کوشش کر رہی ہیں۔

سفارت خانے نے پیر کے روز جاری ایک بیان میں اس جانب اشارہ کیا ہے کہ عراقی حکومت سے وابستہ بعض عناصر دہشت گرد ملیشیاؤں کو سیاسی اور مالی تحفظ فراہم کر رہے ہیں۔

بیان میں واضح کیا گیا ہے کہ ایران کی حلیف عراقی دہشت گرد ملیشیائیں پورے عراق بشمول خطہ کردستان میں امریکی شہریوں اور امریکہ سے وابستہ اہداف کے خلاف مزید حملوں کی منصوبہ بندی جاری رکھے ہوئے ہیں۔

اس کے علاوہ سفارت خانے نے بتایا کہ فضائی پروازیں محدود پیمانے پر بحال کر دی گئی ہیں اور ان امریکی شہریوں پر زور دیا ہے جو عراق کے راستے فضائی سفر کا ارادہ رکھتے ہیں کہ وہ عراقی فضائی حدود میں میزائلوں، ڈرونز اور گولہ باری کے مسلسل خطرات سے آگاہ رہیں۔

ڈالر کی ترسیل روک دی گئی

اسی دوران العربیہ اور الحدث کے ذرائع نے انکشاف کیا ہے کہ ریاستہائے متحدہ امریکہ نے نئی حکومت کی تشکیل تک ڈالروں کی ترسیل روک دی ہے۔

ذرائع کے مطابق امریکی جانب سے سکیورٹی کوآرڈینیشن کے اجلاس بھی نئی حکومت کی تشکیل اور امریکی سفارت خانے اور بغداد انٹرنیشنل ایئرپورٹ پر لاجسٹک سپورٹ بیس پر بمباری میں ملوث افراد کے بے نقاب ہونے تک معطل کر دیے گئے ہیں۔

اسی طرح واشنگٹن نے عراقی سکیورٹی اداروں کی فنڈنگ بھی منجمد کر دی ہے۔

واضح رہے کہ بغداد میں امریکی سفارت خانے، اربیل میں قونصل خانے اور عراقی دارالحکومت میں سفارتی سپورٹ سینٹر کو ایران نواز ملیشیاؤں کی جانب سے بارہا حملوں کا نشانہ بنایا گیا ہے جن میں سے کچھ الحشد الشعبی کا حصہ ہیں۔ یہ حملے 28 فروری سنہ 2026ء کو امریکہ اور اسرائیل کے ایک طرف اور ایران کے دوسری طرف ہونے کے بعد سے جاری جنگ کے آغاز کے بعد سے شروع ہوئے۔

دوسری جانب عراقی حکومت نے کئی بار اس بات پر زور دیا ہے کہ ملک کو علاقائی اور بین الاقوامی تنازعات سے دور رکھنا ضروری ہے۔

عراق گذشتہ کئی برسوں سے اپنے دو اتحادیوں ایران اور امریکہ کے درمیان کشمکش کے باعث خود کو اس تنازعے کے بیچ پاتا رہا ہے اور دونوں جانب کے تعلقات میں توازن برقرار رکھنے کی کوششوں میں مصروف ہے