لبنان کے ساتھ رابطہ کاری... کویت میں 5 لاکھ نشہ آور گولیوں کی اسمگلنگ ناکام

کویتی سکیورٹی حکام نے لبنان کے متعلقہ اداروں کے ساتھ رابطہ کاری کے بعد ایک خلیجی ملزم کے قبضے سے پانچ لاکھ نشہ آور گولیاں برآمد کر کے انھیں اسمگل کرنے کی کوشش ناکام بنا دی ہے۔ لبنان کے مرکزی انسداد منشیات بیورو نے کھیپ بھیجنے والے شخص کو بھی گرفتار کر لیا ہے۔

معلومات کے مطابق کویتی سکیورٹی اداروں نے بحری سرحدی مراکز میں سے ایک کے ذریعے ملک میں آنے والی اس کھیپ کی نگرانی کی، جسے غذائی اشیاء کے طور پر رجسٹرڈ کیا گیا تھا۔ تلاشی لینے پر معلوم ہوا کہ اس میں خفیہ اور جدید طریقے سے چھپائی گئی نشہ آور گولیاں موجود ہیں۔ اس کے بعد جنرل ڈائریکٹوریٹ آف کسٹمز کے ساتھ ہم آہنگی کے ذریعے اسے قبضے میں لے لیا گیا۔

حکام نے ایک منظم جال بچھا کر کھیپ وصول کرنے والے شخص کو گرفتار کر لیا، جس کے قبضے سے لگ بھگ 500,000 کیپٹاگون گولیاں برآمد ہوئیں۔ یہ گولیاں تجارت کی غرض سے لائی گئی تھیں۔ ملزم اور برآمد شدہ مال کو قانونی کارروائی کے لیے متعلقہ حکام کے حوالے کر دیا گیا ہے۔

وزارتِ داخلہ نے منشیات کی لعنت کے خاتمے کے لیے اپنی کوششیں جاری رکھنے اور اسمگلروں کے تعاقب میں علاقائی و بین الاقوامی تعاون کو مزید مضبوط بنانے کے عزم کا اعادہ کیا ہے۔ وزارت نے معاشرے کو اس خطرناک آفت سے بچانے کے لیے قانون پر سختی سے عمل درآمد کرنے پر بھی زور دیا ہے۔