شامی وزیر خارجہ کا دورہ قاہرہ، تعلقات کے فروغ اور موقف میں ہم آہنگی پر اتفاق

اپنے پہلے سرکاری دورہ قاہرہ کے موقع پر شامی وزیر خارجہ اسعد الشیبانی نے مصری وزیر خارجہ بدر عبد العاطی سے ملاقات کی۔ اس ملاقات میں خطے کی صورتحال، دوطرفہ تعلقات کی پیش رفت اور موجودہ علاقائی حالات کے حوالے سے مشترکہ موقف اپنانے پر تبادلہ خیال کیا گیا۔

مصری وزارت خارجہ کے سرکاری ترجمان سفیر تمیم خلاف نےبتایا کہ بدر عبد العاطی نے مذاکرات کے دوران مصر اور سوريا کے درمیان گہرے تاریخی، عوامی اور ثقافتی تعلقات کی اہمیت پر زور دیا۔

شامی بحران اور مصری موقف

بدر عبد العاطی نے اس بات پر بھی زور دیا کہ شامی بحران کے آغاز سے ہی مصر کا موقف واضح اصولوں پر مبنی رہا ہے، جن کا مقصد امن و استحکام کی بحالی، شام کی وحدت اور اس کے قومی ڈھانچے کو برقرار رکھنے کی کوششوں کی مخلصانہ حمایت کرنا ہے۔

اسی طرح انہوں نے شامی عوام کے تمام طبقات کی امنگوں کے لیے قاہرہ کی حمایت کا اعادہ کیا اور شام کی خودمختاری، وحدت، استحکام اور علاقائی سالمیت کے مکمل احترام اور شامی قومی اداروں کے تحفظ کی ضرورت پر زور دیا۔ انہوں نے شام کے اندرونی معاملات میں کسی بھی قسم کی بیرونی مداخلت کو مسترد کر دیا۔

انہوں نے دہشت گردی اور انتہا پسندی کی تمام صورتوں کے خلاف مشترکہ جدوجہد، غیر ملکی جنگجوؤں کے مسئلے سے نمٹنے اور شام کو استحکام کا گہوارہ بنانے کے لیے کوششیں تیز کرنے کی ضرورت پر بھی زور دیا۔

اسرائیلی خلاف ورزیوں کی مذمت

علاقائی سطح پر بدر عبد العاطی نے شام کی خودمختاری کی اسرائیلی سفاکیت اور کھلی خلاف ورزیوں کو قطعی طور پر مسترد کرنے کا اظہار کیا۔ انہوں نے اسرائیلی افواج کی جانب سے شام کی موجودہ صورتحال کا فائدہ اٹھاتے ہوئے مزید علاقوں پر قبضے اور ملک کے امن و استحکام کو سبوتاژ کرنے کی کوششوں کی بھی مذمت کی۔

وزیر خارجہ نے مطالبہ کیا کہ اسرائیل سنہ 1974ء کے فوجیوں کی علیحدگی کے معاہدے کی پاسداری کرے۔ انہوں نے شامی گولان پر اسرائیلی قبضہ ختم کرنے کی ضرورت کے حوالے سے مصر کے غیر متزلزل اور حامی موقف کا اعادہ کیا۔

علاقائی صورتحال پر تبادلہ خیال

مذاکرات کے دوران خطے میں تیزی سے بدلتی ہوئی صورتحال بشمول امریکہ اور ایران کے مابین مذاکرات کی پیش رفت، کشیدگی کم کرنے اور اشتعال انگیزی پر قابو پانے کی کوششوں اور لبنان کے حالات پر بھی بحث کی گئی۔

واضح رہے کہ اسعد الشیبانی اور شامی وزیر اقتصادیات و صنعت نضال الشعار نے مصری وزیر صنعت انجینئر خالد ہاشم اور جنرل اتھارٹی فار انوسٹمنٹ کے سربراہ ڈاکٹر محمد عوض سے بھی ملاقات کی، جس کے بعد مصر کے ساتھ ایک بزنس کونسل تشکیل دینے کا اعلان کیا گیا۔