فلسطینی وزارتِ صحت نے پیر کو کہا کہ اسرائیلی افواج نے دو فلسطینیوں کو گولی مار کر ہلاک کر دیا جب اسرائیلی آبادکاروں کے ایک گروپ نے رات گئے مقبوضہ مغربی کنارے کے ایک گاؤں پر حملہ کیا۔
فوج نے کہا کہ فلسطینیوں کی جانب سے پتھراؤ کے بعد فوجیوں نے فائرنگ کی۔
رام اللہ میں قائم وزارت نے ان دونوں کی شناخت 53 سالہ عودۃ عبدالرحیم عودۃ اور 26 سالہ احمد عادل رشید کے طور پر کی ہے۔
وزارت نے کہا ، "وہ دیر جریر قصبے میں (اسرائیلی) قابض فوج کی فائرنگ سے ہلاک ہوئے۔"
ایک الگ بیان میں فلسطین ہلالِ احمر سوسائٹی نے کہا کہ اس کی ٹیموں نے اتوار کو دیر گئے قصبے میں آبادکاروں کے حملے میں زخمی ہونے والے ایک دوسرے شخص کو باہر نکالا۔
اسرائیل کی فوج نے اے ایف پی کو بتایا کہ فوجیوں کو دیر جریر روانہ کر دیا گیا تاکہ اسرائیلی آبادکاروں کی حفاظت اور انخلا کیا جا سکے جو مویشیوں کی بازیابی کے لیے علاقے میں داخل ہوئے تھے۔
فوج نے کہا، "علاقے میں پرتشدد تصادم شروع ہو گیا جس کے دوران دہشت گردوں نے افواج پر پتھر اور کنکریٹ کے بلاکس پھینکے۔ افواج نے خطرہ دور کرنے کے لیے فائرنگ کر کے جواب دیا۔ زد میں آنے والوں کی نشاندہی کی گئی۔"
دیر جریر کے میئر عید حماد نے کہا کہ آباد کار مویشی لینے آئے تھے جو ان کے نہیں تھے۔
انہوں نے پیر کے روز دو آدمیوں کے جنازے پر کہا کہ آبادکار، اسرائیلی فوج اور پولیس کے ہمراہ گاؤں کے مضافات میں پہنچے اور مقامی باشندوں کے بھیڑوں کے باڑے پر چھاپہ مارا۔
حماد نے کہا، "وہ ایک ٹرک لائے اور اس میں بھیڑیں لاد دیں۔ جب آبادکار وہاں موجود تھے، گاؤں کے نوجوان آئے اور ان کا سامنا کیا۔ فوج نے اس کے بعد مداخلت کی اور وہاں موجود نوجوانوں پر فائرنگ شروع کر دی جس کے نتیجے میں ہلاکتیں ہوئیں۔"
