ایتھوپیئن فضائی کمپنی کے طیارے کی لاہور میں ہنگامی لینڈنگ

ایتھوپئین ایئرلائنز کے ایک طیارے کو دوران پرواز مسافروں کے مابین مار کٹائی کے باعث لاہور کے علامہ اقبال بین الاقوامی ایئرپورٹ پر ہفتے کی صبح ہنگامی لینڈنگ کرنا پڑ گئی۔

میڈیا رپورٹس کے مطابق افریقی ملک ایتھوپیا کی فضائی کمپنی ایتھوپئین ایئر لائن کی پرواز ادیس ابابا سے بیجنگ جا رہی تھی کہ دوران پرواز اس میں سوار دو مسافروں کے درمیان کسی بات پر جھگڑا ہو گیا۔ جھگڑے کے باعث دونوں کو خاصی چوٹیں آئیں لیکن ایک مسافر کی حالت زیادہ تشویشناک تھی، جس کے باعث طیارے نے لاہور ایئرپورٹ پر ہنگامی لینڈنگ کی۔

ایئرپورٹ ذرائع کا کہنا ہے کہ طیاے کے کپتان کی جانب سے تفصیلات سے آگاہ کئے جانے کے بعد رن سے کے قریب ہی ایک ایمبولینس بھی پہنچا دی گئی تھی جس کی مدد سے زخمی مسافر کو اسپتال لے جایا گیا جہاں اس کا علاج جاری ہے جب کہ طیارہ دوبارہ اپنی منزل کی جانب روانہ ہو گیا۔