وزیر اعظم کی قطری تاجروں کی ملاقات، پاکستان میں سرمایہ کاری کی دعوت

قطرکی نمایاں کاروباری شخصیات نے وزیر اعظم پاکستان محمد شہباز شریف کی دعوت پر پاکستان میں توانائی اور انفراسٹرکچر سمیت مختلف شعبوں میں سرمایہ کاری بڑھانے میں گہری دلچسپی کا اظہار کیا ہے۔

وزیراعظم آفس کے میڈیا ونگ کی طرف سے جاری بیان کے مطابق وزیر اعظم شہباز شریف سے قطر بزنس مین ایسوسی ایشن (کیو بی اے) کے وفد نے شیخ فیصل بن قاسم الثانی کی سربراہی میں جمعہ کو یہاں ملاقات کی۔

وفد میں قطر کی سرکردہ کاروباری شخصیات جن میں المنا گروپ کے وائس چیئرمین اور سی ای او سعود بن عمر بن حمد المنا ، منائی کارپوریشن کے ایگزیکٹو ڈائریکٹرخالد احمد المنائی،چیئرمین ایم ای این اے( MENA ) اور ڈوئچے بینک کے چیف کنٹری آفیسر صلاح محمد جیدہ، منصور جاسم الثانی گروپ کے چیئرمین شیخ منصور بن جاسم الثانی، بلیو سیلون کے سی ای او نبیل ابو عیسیٰ اور ڈائریکٹر سینڈین گروپ یوسف ابراہیم المحمود سمیت معیشت کے اہم شعبوں کے با اثررہنما شامل تھے۔

ملاقات میں تجارت، سرمایہ کاری اور اقتصادی شراکت داری کو مضبوط بنانے کے لئے مشترکہ اہداف کی نشاندہی پر زور دیا گیا۔

وزیر اعظم شہباز شریف نے قطرکے کاروباری رہنماؤں کو پاکستان میں سرمایہ کاری کی باضابطہ دعوت دیتے ہوئے پاکستان کے سرمایہ کاری کے لیے پرکشش مقام کی حیثیت سے توانائی، انفراسٹرکچر اور دیگر اہم اقتصادی پراجیکٹس کے شعبوں میں سرمایہ کاری کے مواقع پر روشنی ڈالی۔

وفد نے پاکستان کے اقتصادی منظر نامے بالخصوص توانائی، ٹیکنالوجی اور بنیادی ڈھانچے کی ترقی کے آئندہ منصوبوں میں دلچسپی کا اظہار کیا۔ ملاقات کے دوران پاک قطر اقتصادی تعلقات اور اس حوالے سے مزید ممکنہ تعاون کا جائزہ لیا جو دونوں ممالک میں روزگار کی تخلیق، اختراعات اور پائیدار ترقی کو آگے بڑھانے میں مددگار ثابت ہو سکتا ہے ۔

وفد نے وزیر اعظم کی دعوت کا مثبت جواب دیتے ہوئے پاکستان کے توانائی اور انفراسٹرکچر کے شعبوں میں اپنی سرمایہ کاری بڑھانے میں گہری دلچسپی کا اظہار کیا۔ وزیر اعظم اور قطری وفد نے اقتصادی استحکام اور ترقی کو تقویت دینے کے لئے دوطرفہ تعاون کی اہمیت پر زور دیا۔

ملاقات میں نائب وزیراعظم و وزیر خارجہ سینیٹر محمد اسحاق ڈار، وزیر دفاع خواجہ محمد آصف وزیر دفاع، وفاقی وزیر تجارت جام کمال خان، وفاقی وزیر خزانہ و محصولات محمد اورنگزیب اور وفاقی وزیر اطلاعات و نشریات عطاء اللہ تارڑ بھی موجود تھے۔