پاکستان میں حج پروازوں کے دوسرے مرحلے کا آغاز

سرکاری نشریاتی ادارے ریڈیو پاکستان نے جمعرات کو رپورٹ کیا کہ پاکستان نے حکومت کے زیرِ اہتمام سکیم کے تحت سفر کرنے والے عازمینِ حج کے لیے حج پروازوں کے دوسرے مرحلے کا آغاز کر دیا ہے۔

پاکستان کے 29 اپریل سے شروع ہونے والے 33 روزہ حج فلائٹ آپریشن کے دوران حکومتی سکیم کے تحت 89,000 سے زائد عازمین سفر کریں گے۔ عازمین کل 342 پروازوں کے ذریعے مکہ اور مدینہ جائیں گے جن میں سے آخری پرواز 31 مئی کو پاکستان سے روانہ ہو گی۔

بدھ کو جیسے ہی آپریشن کا دوسرا مرحلہ شروع ہوا، مذہبی امور و بین المذاہب ہم آہنگی کے وزیرِ سردار محمد یوسف نے جدہ ایئرپورٹ پر 305 عازمین کا استقبال کیا۔ وہ مکہ روٹ انیشیٹو کے تحت اسلام آباد سے براہِ راست وہاں پہنچے تھے۔

ریڈیو پاکستان نے رپورٹ کیا، "تقریباً 46,000 عازمین اس مہینے کی 31 تاریخ تک جدہ کے راستے مکہ مکرمہ پہنچیں گے۔ وہ حج کے بعد مدینہ منورہ روانہ ہوں گے۔"

مکہ روٹ انیشی ایٹو امیگریشن کے عمل کو ہموار کرنے کے لیے ڈیزائن کیا گیا ہے تاکہ عازمینِ حج روانگی کے ایئرپورٹس پر ہی سفر کی باضابطہ رسمی کارروائیاں مکمل کر سکیں۔ ابتدائی طور پر 2019 میں اسلام آباد میں تجربہ کردہ اس پروگرام کو بعد میں کراچی تک وسعت دے دی گئی جس سے دسیوں ہزار پاکستانی مسافروں کو بہت سہولت ہوئی۔ اس سے مملکت پہنچنے پر حجاج کرام کے کئی گھنٹے بچ جاتے ہیں کیونکہ وہ دوبارہ امیگریشن کی کارروائی کے بغیر ملک میں بآسانی داخل ہو سکتے ہیں۔

اس اقدام کے تحت اس سال تقریباً 50,500 پاکستانی عازمین سعودی عرب جائیں گے۔ یہ سکیم 2019 میں سعودی وزارتِ حج و عمرہ نے شروع کی تھی اور اسے پانچ ممالک میں نافذ کیا گیا ہے: پاکستان، ملائیشیا، انڈونیشیا، مراکش اور بنگلہ دیش۔