پاکستان کے خارجہ امور کے وزیر اور نائب وزیر اعظم ہونے کے ساتھ ساتھ وزیر اعظم شہباز شریف کے قریبی رشتہ دار اسحاق ڈار نے کہا ہے کہ پاکستان اور امریکہ تجارتی معاہدے کے بہت قریب ہیں۔ انہوں نے جمعہ کے روز اس امر کا اظہار کر کے حالیہ مہینوں میں امریکہ و پاکستان کے درمیان دوطرفہ بڑھنے والی قربت کی غیررسمی انداز میں توثیق بھی کر دی ہے۔ وہ امریکی وزیر خارجہ مارکو روبیو سے ملنے کے بعد کافی پر جوش اور خوش تھے۔
تاہم امریکہ کے وزیر خارجہ روبیو یا امریکی دفتر خارجہ نے اس سلسلے میں کوئی ٹائم لائن واضح نہیں کی ہے۔
پاکستان کے وزیر خارجہ اسحاق ڈار نے کہا میں سمجھتا ہوں کہ ہم امریکہ کے ساتھ تجارتی معاہدے کو حتمی شکل دینے کے بہت قریب پہنچ چکے ہیں۔ اس سلسلے میں وزیر اعظم نے ایک کمیٹی بھی قائم کردی ہے جو اس معاملے کی نوک پلک درست کرے گی۔ وہ واشنگٹن کے اٹلانٹک کونسل تھنک ٹینک میں گفتگو کر رہے تھے۔ وہ یہ بھی کہہ رہے تھے یہ بات مہینوں تک جانے والی ہے نہ ہفتوں تک جانے کی ہے۔ بلکہ محض یہ اب دنوں کی بات ہے۔
بظاہر لگتا ہے کہ وزیر خارجہ اسحاق ڈار نے اس دوران سفارتی اور دو طرفہ خارجہ امور کے بجائے زیادہ توجہ معاشی اور قانونی عدالتی موضوعات کو دی اور ان کے یہ گفتگوئیں خوب وائرل ہوئی ہیں۔ کیونکہ امریکہ اور پاکستان میں عوامی دلچسپی کی کافی وجوہ رکھتے ہیں۔ اس وجہ سے ان کی شخصیت کو ہی نہیں امریکہ اور پاکستان میں ان کی اعلیٰ قیادت و حکومت کو بھی کافی رد عمل کا سامنا کرنا پڑا ہے کہ انہوں نے عافیہ صدیقی کیس میں حکومتی سوچ واضح کر کے عوامی غصے کو دعوت دے دی تھی۔
دونوں ملکوں کے وزرائے خارجہ کی ملاقات کے بعد امریکی دفتر خارجہ اور پاکستان کے دفتر خارجہ نے الگ الگ بیانات بھی جاری کیے ہیں اور ملاقات کی اہمیت پر روشنی ڈالی ہے۔
تاہم تجارتی شعبے میں کسی پیش رفت کے لیے کوئی ڈیڈ لائن ظاہر نہیں ہے۔ البتہ دونوں طرف سے تجارت پر زور دیا گیا ہے۔
صدر ٹرمپ بھارت اور پاکستان میں جنگ بندی کرانے کا جو کریڈٹ لیتے ہیں اس کی بڑی وجہ بھی تجارتی ترغیبات کو ہی قرار دیتے ہیں۔ اگرچہ بھارت اور اس کی وزیر اعظم مودی کی سرکار کے لیے ٹرمپ کا جنگ بندی کرانے کا ذکر تکلیف دہ بات بن چکا ہے۔
امریکی وزیر خارجہ مارکو روبیو نے سوشل میڈیا پلیٹ فارم ' ایکس ' پر کہا ہے کہ ملاقات میں اہم معدنیات اور معدنی کانوں کے حوالے سے بھی بات چیت کی گئی۔ خیال رہے اس سلسلے میں کوئی ٹائم لائن بیان نہیں کی گئی ہے۔
