پاکستان نے پی ایس ایل کی دو نئی فرنچائزز کے لیے 10 بولی دہندگان کو منتخب کر لیا

پاکستان کرکٹ بورڈ (پی سی بی) نے اس ہفتے اعلان کیا ہے کہ اس نے اگلے ماہ پاکستان سپر لیگ (پی ایس ایل) کی دو نئی فرنچائزز کے لیے بولی لگانے میں دلچسپی رکھنے والی 10 پارٹیز کو منتخب کر لیا ہے۔

پاکستان اگلے سال 26 مارچ سے 11 مئی تک پی ایس ایل کا 11 واں ایڈیشن منعقد کرے گا جس میں دو نئی فرنچائزز افتتاح کرنے والی ہیں۔ پی سی بی نے رواں ماہ نیویارک اور لندن میں روڈ شوز کا انعقاد کیا جن کا مقصد سرمایہ کاروں کو نئی فرنچائزز خریدنے کے لیے راغب کرنا اور دلچسپی رکھنے والی پارٹیز کو ٹیموں کے لیے بولی لگانے کی دعوت دینا تھا۔

پی سی بی نے اس ہفتے کے شروع میں کہا تھا کہ دلچسپی رکھنے والی 12 پارٹیز نے نئی ٹیموں کے لیے بولی لگائی تھی۔

بورڈ نے ہفتے کے روز ایک بیان میں کہا، "ایک مکمل اور شفاف تشخیصی عمل کے بعد پی سی بی بولی کمیٹی نے 10 بولی دہندگان کو اہل قرار دیا ہے جو کامیابی سے تکنیکی معیار پر پورا اترے اور اب دوسرے مرحلے میں داخل ہو گئے ہیں۔"

پی سی بی نے کہا، یہ 10 بولی دہندگان اب آٹھ جنوری کو اسلام آباد کے جناح کنونشن سینٹر میں منعقدہ نیلامی میں حصہ لیں گے۔ یہاں ایچ بی ایل پی ایس ایل کی دو نئی ٹیموں کے فرنچائز حقوق دستیاب ہوں گے۔

نیلامی میں کامیاب بولی دہندگان کو اپنی فرنچائز ٹیم کے لیے مندرجہ ذیل میں سے کوئی ایک نام منتخب کرنے کا حق حاصل ہو گا: راولپنڈی، حیدرآباد، فیصل آباد، گلگت، مظفر آباد اور سیالکوٹ۔

پی ایس ایل کے سی ای او سلمان نصیر نے یہ عمل کامیابی سے مکمل کرنے پر اہل بولی دہندگان کو مبارکباد دی۔

انہوں نے کہا، "ایچ بی ایل پی ایس ایل لیگ کی توسیع اور ارتقاء میں ایک اور اہم سنگِ میل حاصل ہونے کا انتظار ہے کیونکہ اب ہم بے چینی سے نیلامی کے لیے تیاری کر رہے ہیں۔"

پاکستان کی پریمیئر ٹی 20 کرکٹ لیگ پی ایس ایل میں مقامی اور بین الاقوامی کھلاڑیوں اور کوچز کا امتزاج دیکھنے کو ملتا ہے۔ اس میں چھے ٹیمیں شامل ہیں اور ہر ایک کا نام پاکستان کے کسی شہر کے نام پر رکھا گیا ہے۔

اگلے سال 11واں ایڈیشن منعقد کرنے والی پی ایس ایل نے تمام دنیا کے کرکٹ ماہرین اور تجزیہ کاروں کی تعریف اور داد حاصل کی ہے اور دنیا کی ممتاز کرکٹ لیگز مثلاً بگ بیش لیگ، کیریبیئن پریمیئر لیگ، انڈین پریمیئر لیگ اور دیگر کی طرح یہ ناظرین کی ایک بڑی تعداد کو راغب کرتی ہے۔