توہینِ رسالت کے الزام کے بعد پاکستان میں عیسائی آبادی پر حملہ

پاکستان میں صوبہ پنجاب کے صدر مقام لاہور کے ایک عیسائی لڑکے کے خلاف توہینِ رسالت کے الزام کے بعد مشتعل افراد نے جوزف کالونی پر دھاوا بول کر گھروں اور مکانوں کو نقصان پہنچایا ہے۔

میڈیا رپورٹس کے مطابق لاہور کے بادامی باغ کے انڈسٹریل ایریا کے قریب واقع جوزف کالونی میں ہفتے کے روز مشتعل افراد نے حملہ کر کے 178 کے قریب مکانات اور دکانوں کو نقصان پہنچایا۔ اسی دوران ایک چرچ کو بھی نذرِ آتش کر دیا گیا۔

جمعہ کی رات کو عیسائی لڑکے ساون مسیح کے خلاف شاہد عمران کی مدعیت میں ضابطہ فوجداری کی دفعہ 295 سی کے تحت توہین رسالت کا مقدمہ درج کیا گیا تھا۔ متعلقہ تھانے کے اہلکار نے بتایا کہ حجام شاہد عمران نے بتایا تھا کہ ساون مسیح نامی لڑکا توہین رسالت کا مرتکب ہوا ہے۔

ہفتے کے روز مشتعل ہجوم پر قابو پانے کی کوشش میں 20 سے زائد پولیس اہل کار زخمی ہو گئے۔ انہوں نے کہا کہ اب صورتِ حال پر قابو پا لیا گیا ہے اور حالات کنٹرول میں ہیں۔ علاقے میں کئی گھروں سے اب بھی دھواں اٹھ رہا ہے، لیکن تنگ گلیوں کی وجہ سے آگ بجھانے کی کوششوں میں مشکل پیش آ رہی ہے۔ تاہم کسی کے زخمی ہونے کی اطلاع نہیں ہے۔ علاقے کی عیسائی آبادی جمعہ کے روز ہی علاقہ چھوڑ کر چلی گئی تھی۔