صحرائی خیمہ ہوٹل شہروں کی ہنگامہ خیزی سے دور منفرد تفریح

بارشوں کے بعد موسم بہار کی آمد کے ساتھ ہی سعود عرب کے شہری زندگی سے لطف اندوز ہونے کے لیے صحراؤں کا رخ کرتے اور شہروں کی ہنگامہ پرور زندگی سے دور پرسکون مقامات تفریح سے لطف اٹھاتے ہیں.

العربیہ ٹی وی کی ایک رپورٹ کے مطابق موسم سرما کی بارشوں کے بعد صحراؤں کے خیمہ ہوٹلوں کی رونق دو بالا ہو جاتی ہے۔ جہاں بڑی تعداد میں نہ صرف نوجوان بلکہ پورےپورے خاندان بھی ان صحرائی خیمہ ہوٹلوں میں کئی کئی دن گذارتے ہیں۔ صاف اور تازہ ہوا اور شور شرابے سے محفوظ ماحول فطرت پسند افراد کے لیے ایک خاص کشش رکھتے ہیں۔

عارضی طور پر بنائے گئے یہ خیمہ ہوٹل جدید ترین پرتعیش ریستورانوں جیسی سہولیات تو نہیں رکھتے لیکن یہاں پرقیام کسی فائیو اسٹار ہوٹل کے مقابلے میں کہیں مہنگا پڑتا ہے کیونکہ صحراء کے اس خیمہ ہوٹل میں ایک رات گذارنے کے فی کس تین ہزار سعودی ریال خرچ ہوتے ہیں۔ صاحب ثروت لوگوں کے لیے یہ بھی کوئی بڑی قیمت نہیں ہے۔ لوگ یہاں اپنی فیملیز کے ہمراہ جاتے اور کئی کئی دنوں تک قیام کرتے ہیں۔

شہروں سے دور دراز صحراؤں میں ان خیمہ ہوٹلوں کے مہنگے ہونے کی بنیادی وجہ موسم کے مطابق زائرین کی سہولت کے لیے گرمی اور ٹھنڈک کا انتظام کرنا ہوتا ہے۔ سردیوں کے موسم میں ماحول کو گرم رکھنے کےلیے ایندھن اور دیگر ضروریات کی فراہمی اچھا خاصا مہنگا کام ہے۔ اس کے باوجود ان ہوٹلوں کے مالکان اپنے گاہکوں کو زیادہ سے زیادہ سہولیات دینے کے لیے کمر بستہ رہتے ہیں۔