بیوی کو تھپڑ رسید کرنے پر سعودی کو ایک دن قید کی سزا

سعودی عرب کے ساحلی شہر جدہ میں ایک سمری عدالت نے ایک شخص کو اپنی بیوی کو چہرے پر دو تھپڑ رسید کرنے کے الزام میں ایک دن جیل کی سزا سنائی ہے۔

سعودی گزٹ میں شائع ہونے والی رپورٹ کے مطابق عدالت نے بیوی کے نجی حق سے متعلق دعوے کو مسترد کردیا ہے۔البتہ اس نے خاوند کو خبردار کیا ہے کہ وہ آیندہ کبھی اپنی بیوی کو نہ مارے۔

بیوی نے عدالت میں دائر کردہ درخواست میں کہا تھا کہ اس کے خاوند نے اسے شدید مارا پیٹا اور اس کے بائِیں کندھے پر ضرب لگائی ہے۔اس نے اپنے دعوے کے حق میں عدالت میں ایک میڈیکل رپورٹ بھی پیش کی تھی۔اس رپورٹ میں یہ بھی کہا گیا تھا کہ اگر کوئی اور پیچیدگی پیدا نہیں ہوتی تو پھر اس کو تین دن تک علاج کی ضرورت ہوگی۔

تاہم خاوند نے عدالت میں اپنی بیوی کے اس دعوے کو مسترد کردیا کہ اس نے اس کو کندھے پر ضرب لگائی ہے۔البتہ اس نے بیوی کو چہرے پر دو تھپڑ مارنے کا اعتراف کیا تھا۔

اس سعودی خاتون کے وکیل اور جنرل پراسیکیوٹر نے عدالت کے فیصلے پر اعتراض کیا ہے لیکن جج نے انھیں اس کے خلاف اپیل دائر کرنے کے لیے تیس دن کا وقت دیا ہے۔بیوی شاید اپنے شوہر نامدار کو سنائی گئی ایک دن قید کی سزا پر مطمئن نہیں ہے اور وہ اس کو زیادہ سزا دلوانا چاہتی ہے۔