شادی کی موج مستی فلسطینی جوڑے کے لیے مصیبت بن گئی

ان دنوں سماجی رابطے کی ویب سائیٹس پرایک نوبیاہتا فلسطینی جوڑے کی فوٹیج وائرل ہو رہی ہے جس میں شادی کی تقریب کے دوران موج مستی کرتے دلہا دُلہن کو سوئمنگ پول میں چھلانگ لگانے کے بعد مصیبت سے دوچار ہوتے دکھایا گیا ہے۔

ویڈیو فوٹیج دیکھنے سے لگتاہے کہ تالاب میں چھلانگ لگاتے ہی دُلہن خود پر قابو نہ رکھ سکی اور اپنےعروسی جوڑے کے وزن کے ساتھ پانی میں ڈوبنے لگی۔ جوڑے نے جو کہ تیراکی سے لطف اندوز ہونے کے لیے تالاب میں کودا تو اگلے ہی لمحے دلہن خود پر قابو پانے میں ناکام رہی۔ دلہا نے اسے بچانے کی پوری کوشش کی۔ دلہن کو پانی میں ڈوبتے دیکھ کر آس پاس کھڑے سب پریشان ہوگئے۔

موقع پر موجود ایک شخص نے ایک لمبی لاٹھی کی مدد سے دلہن کو بچانے میں مدد کی۔ قبل اس کے کہ دلہن پانی میں ڈوب مرتی کنارے پر کھڑے شخص نے لاٹھی کی مدد سے اسے بچالیا۔ میڈیا رپورٹس کے مطابق خاتون کے لیے خود کو قابو نہ کرپانے کی وجہ اس کا عروسی جوڑا بنا۔ عروسی جوڑے میں پانی داخل ہوتے ہی وہ بہت بھاری ہوگیا جس کے باعث دلہن کے لیے اسے اٹھانا ناقابل برداشت ہوگیا۔