کچھ کتے گفتگو سن کر نئے الفاظ سیکھ سکتے ہیں: سائنسی تحقیق

ایک نئی تحقیق جو جمعرات کو جریدے ''سائنس ''میں شائع ہوئی، اس سے معلوم ہوا ہے کہ کچھ کتے جو پہلے ہی تربیت اور کھیل کے ذریعے کھلونوں کے نام سیکھنے کی صلاحیت کے لیے جانے جاتے ہیں، صرف انسانی بات چیت سن کر بھی الفاظ کو سمجھ سکتے ہیں۔

ویانا ویٹرنری یونیورسٹی کی محققہ شانی ڈرور نے برسوں تک ایک تجربہ کیا، جس میں ایسے کتوں کی صلاحیت کا مشاہدہ کیا جو سماجی معاملات کے ذریعے زبان سیکھنے میں غیر معمولی قابلیت رکھتے تھے۔

ڈرور نے اپنی تحقیق میں دیکھا کہ کچھ کتے ایسے لگتے ہیں، جیسے وہ اپنے مالکان کی باتیں سن رہے ہوں۔ انہوں نے فرانس پریس ایجنسی کو بتایا:مثال کے طور پر جب مالکان پیزا کے آرڈر کے بارے میں بات کر رہے تھے، تو ان کا کتا کھلونوں کے کمرے میں گیا اور پیزا نامی کھلونا لے آیا۔

انہوں نے ہنگری کی لورانڈ-ایوٹیفوس یونیورسٹی کی ٹیم کے تعاون سے یہ جاننے کی کوشش کی کہ آیا یہ غیر معمولی ذہین کتے بغیر براہِ راست تربیت کے نئے لفظ اور نئے کھلونے کے درمیان تعلق قائم کر سکتے ہیں یا نہیں۔

تحقیق سے معلوم ہوا کہ یہ باصلاحیت کتے نئے کھلونوں کے نام سن کر سیکھ سکتے ہیں اور جب انہیں براہِ راست نام بتایا جائے تو بھی وہ اسے یاد رکھ کر بعد میں درست کھلونا لا سکتے ہیں۔تاہم یہ کتے استثنائی کیسز ہیں ۔

ڈرور نے بتایا کہ سات سال کے دوران ان کی ٹیم نے صرف تقریباً 45 ایسے کتوں کی شناخت کی جو کھلونوں کے نام جانتے تھے۔ڈرور کا کہنا ہے کہ یہ نتائج اس بات کے شواہد فراہم کرتے ہیں کہ سماجی سیکھنے کے لیے ایک پیچیدہ میکانزم موجود ہے، یہ جاننے کے لیے کہ آیا یہ کسی ایسے جانور میں بھی پایا جاتا ہے، جس کے پاس زبان نہیں ہے۔

انہوں نے کہا:ہم نے دریافت کیا کہ یہ صلاحیت موجود ہے اور یہ ظاہر کرتا ہے کہ انسانوں کے پاس زبان پیدا ہونے سے پہلے بھی دوسروں سے سیکھنے کی یہ پیچیدہ علمی صلاحیت موجود تھی۔

ایریزونا اسٹیٹ یونیورسٹی میں کتے کے رویے کے ماہر کلیوِف وین نے کہا کہ یہ تحقیق بہت احتیاط کے ساتھ کی گئی ہے، لیکن انہوں نے واضح کیا کہ جو جانور تحقیق میں شامل تھے وہ ''انتہائی غیر معمولی '' ہیں، اس لیے تمام کتوں کے مالکان کو اپنی پالتو جانوروں سے ذہانت کی حیران کن صلاحیتیں توقع نہیں رکھنی چاہئیں۔