سپورٹس کٹ پہنے سیسی پیشگی انتخابی مہم پر چل نکلے

مصر کے سابق فوجی سربراہ فیلڈ مارشل عبدالفتاح السیسی اپنی صدارتی انتخابی مہم میں پہلی مرتبہ عوام میں نہایت بے خوفی سے گھومتے پھرتے دیکھے گئے ہیں۔ صدارتی انتخابات کے لیے کاغذات نامزدگی جمع کرانے کا اعلان ہوتے ہی جنرل السیسی کو قاہرہ کے قریب ففتھ گورنری میں سائیکل پر گھومتے دیکھا گیا۔

العربیہ ڈاٹ نیٹ کے مطابق سوشل میڈیا پر تیزی سے مقبول ہونے والی ایک تصویر میں فیلڈ مارشل [ریٹائرڈ] عبدالفتاح السیسی اسپورٹس کٹ پہنے راہ چلتے عوام کی توجہ کا مرکز بنے ہوئے ہیں۔ السیسی شہریوں سے بے خوف گھل مل کر ان سے انتخابات اور ملکی سیاست کے بارے میں گپ شپ بھی کر رہے ہیں۔ ہلکی پھلکی گفتگو میں انہوں نے شہریوں پر زور دیا کہ وطن کے مفہوم سے ناآشنا دہشت گردوں کا مقابلہ کرنے لئے اپنی صفوں میں اتحاد پیدا کریں۔

شہریوں سے گفتگو کرتے ہوئے انہوں نے کہا کہ مُجھے اپنی جان کی کوئی پرواہ نہیں۔ میں عوام کی پکار پر لبیک کہتے ہوئے صدارتی انتخاب کی مہم چلا رہا ہوں۔ عوام کی امنگوں کو سامنے رکھتے ہوئے میں نے وزیر دفاع کے عہدے سے استعفیٰ دیا۔ میں یقین دلاتا ہوں کہ عوام نے مجھ پر جس اعتماد کا اظہار کیا ہے اس پر میں پورا اتروں گا، چاہے اپنی جان ہی سے کیوں نہ گذرنا پڑے۔

خیال رہے کہ مصر میں 25-26 مئی کو ہونے والے صدارتی انتخاب کے لیے الیکشن کمیشن نے امیدواروں کے کاغذات نامزدگی جمع کرنا شروع کر دیے ہیں۔ کاغذات نامزدگی جمع کرانے کی آخری تاریخ 20 اپریل مقرر کی گئی ہے۔

یاد رہے کہ فیلڈ مارشل عبدالفتاح السیسی نے گذشتہ بدھ کو صدارتی انتخابات میں حصہ لینے کے لیے وزارت دفاع کے منصب سے استعفیٰ دے دیا تھا۔