عدن: جنوبی یمن کی آزادی کے حق میں مظاہرے

یمن کے جنوبی شہر عدن میں ہزاروں لوگوں نے مظاہرے کیے ہیں اور انھوں نے جنوبی یمن کی آزادی اور اس کی ایک مرتبہ پھر شمالی یمن سے علاحدگی کا مطالبہ کیا ہے۔

جنوبی یمن میں گذشتہ قریباً ایک عشرے سے شمالی یمن سے علاحدگی کی تحریک چل رہی ہے اور اس کے مکین صنعا حکومت پر ان کے جائز مطالبات بھی تسلیم نہ کرنے کے الزامات عاید کرتے چلے آرہے ہیں جبکہ جنوبی صوبوں میں جزیرہ نما عرب میں القاعدہ سرگرم ہے اور اس کے جنگجو سکیورٹی فورسز پر حملے کرتے رہتے ہیں۔

جنوبی یمن کے باشندوں نے ایک مرتبہ پھر آزادی کے لیے ایسے وقت میں مظاہرے شروع کیے ہیں جب دارالحکومت صنعا میں مسلح شیعہ حوثی باغیوں نے قبضہ کر رکھا ہے اور انھوں نے وہاں اپنی عمل داری قائم کررکھی ہے جبکہ صدر عبدربہ منصور ہادی کی قیادت میں حکومت عملاً مفلوج ہوکررہ گئی ہے اور اس کا کنٹرول کہیں نظر نہیں آتا ہے۔

عدن کے علاوہ ملک کے دوسرے بڑے شہر تعز اور دو جنوبی صوبوں شیبوۃ اور حضرموت کے شہروں میں بھی جنوبی یمن کی علاحدگی کی تحریک کے زیراہتمام مظاہرے کیے گئے ہیں۔مظاہرین نے آزادی کے علاوہ صنعا سے مسلح حوثیوں کو نکال باہر کرنے کے مطالبات بھی کیے ہیں۔