شام میں عسکری تربیت پر دو برطانویوں کو جیل کی سزا

برطانیہ میں ایک فوجداری عدالت نے دو سگے بھائیوں کو شام میں عسکری تربیت لینے کے الزام میں جیل کی سزا سنائی ہے۔

انگلینڈ اور ویلز کی سنٹرل کریمنل کورٹ نے تیس سالہ محمود نواز اور چوبیس سالہ حمزہ نواز کو دہشت گردی کی تربیت لینے کے الزام میں قصور وار قرار دے کر بالترتیب ساڑھے چار سال اور تین سال قید کا حکم دیا ہے۔یہ پہلا مقدمہ ہے جس میں شام میں جاری خانہ جنگی میں شرکت کے الزام میں کسی برطانوی شہری کو سزا سنائی گئی ہے۔

ان دونوں بھائیوں کے موبائل فونز سے پولیس کو ایسی تصاویر ملی تھیں جن میں محمود نے آتشیں رائفل اے کے 47 اٹھا رکھی تھی اورفوجی وردی پہن رکھی تھی۔فون میں موجود ایک تصاویر میں تربیتی کیمپ کا روزانہ کا شیڈول بھی دیا گیا تھا۔اس میں اسلامی اسباق اور عسکری تربیت کے سیشنز کی تفصیل درج تھی۔

محمود اور حمزہ کو گذشتہ ستمبر میں برطانیہ کے بارڈر افسروں نے خانہ جنگی کا شکار شام سے لوٹنے کے بعد گرفتار کیا تھا۔انھوں نے تحقیقات کے دوران حکام کو بتایا تھا کہ وہ ''جندالشام'' نامی گروپ کی حمایت کرتے تھے۔