شہزادہ سعود الفیصل مکہ کے العدل قبرستان میں آسودہ خاک

سعودی عرب کے سابق وزیرخارجہ شہزادہ سعود الفیصل کو مکہ مکرمہ میں العدل قبرستان میں سپرد خاک کردیا گیا ہے۔ مرحوم کی میت امریکا سے سعودی عرب منتقل کیے جانے کے بعد مسجد حرام میں لائی گئی جہاں خادم الحرمین الشریفین شاہ سلمان بن عبدالعزیز نے ان کی نماز جنازہ پڑھائی۔

خیال رہے کہ سابق وزیرخارجہ شہزادہ سعود الفیصل کینسر کے علاج کے لیے امریکا میں منتقل کیے گئے تھے تاہم وہ جمعہ کے روز امریکا کے ایک اسپتال میں خالق حقیقی سے جا ملے۔ ان کا جسد خاکی ہفتے کے روز جدہ منتقل کیا گیا تھا۔

العربیہ ڈاٹ نیٹ کے مطابق مکہ مکرمہ کے گورنر شہزادہ خالد الفیصل آج اتوار کو شاہ سلمان بن عبدالعزیز سے خصوصی ملاقات کریں گے۔

نماز جنازہ میں کویت کے امیر الشیخ صباح الاحمد الصباح، متحدہ عرب امارات کے وزیر خارجہ الشیخ عبداللہ بن زاید، بحرینی وزیر خارجہ الشیخ خالد بن آل خلیفہ، اردنی وزیر خارجہ ناصر جودہ، مصری وزیر خارجہ سامح شکر اور ترک وزیر خارجہ سمیت کئی عالمی رہ نمائوں نے شرکت کی۔