مسافر کے ریح خارج کرنے پر جہاز کو ہنگامی لینڈنگ کرنا پڑ گئی!

عموماً فضائی سفر کے دوران فنی خرابی یا کسی بڑی پریشانی کے سبب ہوائی جہاز کی ایمرجنسی لینڈنگ کرائی جاتی ہے تاہم ٹرانساویا ایئرلائن کی دبئی سے ہالینڈ جانے والی پرواز کو ایک مسافر کی طرف سے مسلسل گیس خارج کرنے پر منزل سے پہلے ہی راستے میں ہنگامی طور پر اترنا پڑ گیا۔

"نیوز ہب" کے مطابق دبئی سے ہالینڈ کے دارالحکومت ایمسٹرڈیم جانے والی ٹرانساویا ایئرلائن کی پرواز کی معمول کی پرواز نے شیڈول کے مطابق اڑان بھری، ابتداء میں سب کچھ ٹھیک رہا تاہم آگے کچھ ایسا ہوا جو لوگوں کے وہم و گمان میں ہی نہ تھا۔

دوران سفر جہاز کا اندرونی ماحول اس وقت خراب ہونے لگا جب ایک مسافر کے گیس خارج کرنے کا نہ رکنے والا عمل شروع ہوا جس پر آس پاس بیٹھے مسافروں نے عملے سے شکایت کی تاہم توجہ دلانے کے باجود مذکورہ شخص بے قابو ہو کر لگاتار گیس خارج کرتا رہا۔

جب مسافروں کے صبر کا پیمانہ لبریز ہوا تو انہوں نے براہ راست جا کر پائلٹ کے سامنے معاملہ بیان کیا۔ کپتان سے شکایت پر وہ شخص آگ بگولہ ہو گیا اور تیش میں آ کرمسافروں سے جھگڑنے لگا جس پر مسافر نشستوں سے کھڑے ہو گئے اور شور شرابا شروع ہو گیا۔

مسافروں میں تلخی بڑھنے لگی تو کپتان نے منزل پر پہنچنے سے قبل ہی آسٹریا کے شہر ویانا کے ہوائی اڈے پر جہاز کی ایمرجنسی لینڈنگ کرا دی جس کے بعد سیکورٹی فورسز نے جہاز میں داخل ہو کر 4 مسافروں کو حراست میں لے لیا اور پرواز کو اپنی منزل کی جانب روانہ کر دیا۔

ٹرانساویا ایئرلائن کے ترجمان نے واقعے کی تصدیق کرتے ہوئے بتایا کہ انہوں نے حراست میں لیے گئے مسافروں پر سفری پابندی کر دی اور ہمیشہ ہمیشہ کے لیے ان مسافروں پر ٹرانساویا ایئرلائن کے دروازے بند کر دیے گئے ہیں۔