سعودی عرب کی مساعی سے سوڈان سے 91 امریکیوں سمیت مزید 220 افراد جدہ پہنچ گئے

سعودی عرب کی جانب سے دوست اور برادر ممالک کے شہریوں کو خانہ جنگی کے شکار سوڈان سے نکالنے کی کوششیں جاری ہیں۔ اسی ضمن میں شاہی سعودی بحریہ کا جہاز "ریاض" ایک سو کے قریب امریکیوں سمیت دو سو بیس افراد کو لے کر جدہ پہنچ گیا ہے۔

العربیہ/ الحدث کے نامہ نگار نے بتایا کہ یہ جہاز عروس بحیرہ احمر میں پہنچا، جس میں 5 ممالک کے 220 افراد سوار تھے، جن میں 14 سعودی شہری، تقریباً 91 امریکی شہری، تین کینیڈین اور جنوبی سوڈان اور یمن کے دیگر شہری شامل تھے۔

درایں اثنا امریکی محکمہ خارجہ نے اعلان کیا کہ جدہ میں امریکی قونصل خانے نے سوڈان سے 350 سے زیادہ امریکیوں کو نکالا ہے۔

سوموار کو "ابھا" جہاز 41 سعودی شہریوں اور افغانستان، فلپائن، کوموروس، سری لنکا، یوکرین، مڈغاسکر، برطانیہ، شام اور امریکا کے 171 باشندوں کو لے کر شاہ فیصل نیول بیس پر پہنچا تھا۔

سعودی عرب برادر اور دوست ممالک کے شہریوں کے لیے تمام بنیادی ضروریات فراہم کرنے کا خواہاں ہے، تاکہ ان کی وطن واپسی میں سہولت فراہم کی جا سکے۔

سعودی وزارت خارجہ نے منگل کو اپنے ٹویٹر اکاؤنٹ کے ذریعے کہا ہے کہ انخلاء کے آغاز سے اب تک سوڈان سے نکالے جانے والوں کی کل تعداد 5,629 ہو گئی ہے، جن کا تعلق 102 ملکوں سے ہے، جن میں 239 سعودی شہری بھی شامل ہیں۔