غزہ میں اسرائیلی بمباری میں بچوں کی ہلاکتیں: پوپ فرانسس کی مذمت

پوپ فرانسس نے جمعے کے روز غزہ میں اسرائیلی فوج کے حملوں میں فلسطینی بچوں کی ہلاکت کی مذمت کرتے ہوئے سکولوں پر بمباری کو ’کریہہ‘ عمل قرار دیا۔

سنگاپور سے روم واپسی کی پرواز پر پوپ نے اس بات پر شک کا اظہار کیا کہ اسرائیل یا حماس جو اب گیارہ ماہ سے حالتِ جنگ میں ہیں، تنازعہ کو ختم کرنے کے خواہاں ہیں۔ پوپ نے کہا، "مجھے یہ کہتے ہوئے افسوس ہوتا ہے۔ لیکن مجھے نہیں لگتا کہ وہ امن قائم کرنے کے لیے اقدامات کر رہے ہیں۔"

فرانسس جنوب مشرقی ایشیا اور اوشیانا کے 12 روزہ دورے کے بعد ایک پریس کانفرنس میں صحافیوں سے بات کر رہے تھے۔

غزہ جنگ بندی اور حماس کے زیرِ حراست اسرائیلی یرغمالیوں کی رہائی کے مطالبات کی حمایت کرنے والے پوپ نے کہا، "بعض اوقات مجھے لگتا ہے کہ یہ ایک ایسی جنگ ہے جو بہت زیادہ شدید ہے"۔

پوپ نے 40 منٹ کی پریس کانفرنس کے دوران سابق امریکی صدر ڈونلڈ ٹرمپ اور نائب صدر کملا ہیرس دونوں ہی کی پالیسیوں کو تنقید کا نشانہ بنایا اور بغیر کسی وضاحت کے کہا، امریکی کیتھولک کو نومبر میں "کم برائی کا انتخاب" کرنا ہو گا۔