اسرائیلی فوج کا مغربی ایران میں میزائل لانچنگ پلیٹ فارموں کو نشانہ بنانے کا اعلان

اسرائیلی فوج نے اعلان کیا ہے کہ اس نے مغربی ایران میں کئی مقامات کو نشانہ بنایا ہے۔ آج منگل کے روز جاری ایک بیان میں فوج نے بتایا کہ "کچھ دیر قبل، اسرائیلی فضائیہ نے مغربی ایران میں کئی فضائی حملے مکمل کیے۔ ان حملوں کے دوران کئی مقامات اور درجنوں زمین سے زمین پر مار کرنے والی میزائل لانچنگ پلیٹ فارموں کو نشانہ بنایا گیا۔"

آج منگل کو تہران کے وسط اور شمالی حصے میں دو زوردار دھماکوں کی آوازیں سنی گئیں، یہ ایران اور اسرائیل کے درمیان غیر معمولی فوجی تصادم کے پانچویں روز کا منظر تھا۔ فی الحال دھماکوں کے مقامات کے بارے میں کوئی معلومات فراہم نہیں کی گئیں۔ اس سے قبل ایرانی سرکاری ذرائع ابلاغ نے اطلاع دی تھی کہ تہران کے مغربی علاقے میں فضائی دفاعی نظام کو فعال کیا گیا ہے۔

دوسری طرف، تہران میں سرکاری ایرانی ٹیلی ویژن کے صدر دفتر میں آج آگ بھڑک اٹھی۔ یہ خبر سرکاری نشریاتی ادارے نے دی، جو کہ ایک روز قبل اسرائیلی حملے میں نشانہ بنایا گیا تھا، جس سے اس کی ایک عمارت کو نقصان پہنچا اور تین افراد جاں بحق ہوئے۔ ایرانی ٹی وی نے کہا: "ریڈیو اور ٹیلی ویژن کی عمارت میں دھواں دیکھا جا سکتا ہے، جو ہوا کی وجہ سے لگی آگ سے پھیلا"۔

اسی دوران، اسرائیلی ذرائع ابلاغ نے منگل کو رپورٹ دی ہے کہ اسرائیل اس وقت مغربی ایران میں حملے کر رہا ہے۔ اس سے قبل اسرائیلی فوج نے آج ہی اعلان کیا تھا کہ اس نے ایران میں متعدد اہداف پر بم باری جاری رکھی ہوئی ہے۔

اسرائیلی فوج کے ترجمان کے مطابق "ہم نے ایران میں زمین سے زمین پر مار کرنے والے میزائل پلیٹ فارموں اور میزائل گوداموں پر حملے کیے ہیں۔" ترجمان نے مزید کہا "ہم ایران کی تمام جوہری تنصیبات پر بم باری جاری رکھے ہوئے ہیں۔ ہم ایران کو جوہری ہتھیار حاصل کرنے کی اجازت نہیں دیں گے۔"

ترجمان نے یہ بھی وضاحت کی کہ اسرائیلی فوج نے ایرانی سرکاری ٹیلی ویژن پر اس لیے حملہ کیا کیوں کہ یہ ایرانی فوج کے زیر انتظام ہے۔ اسرائیلی فوج نے یہ دعویٰ بھی دہرایا کہ اس نے "ایرانی اعلیٰ فوجی کمانڈر" علی شادمانی کو ایک "درست آپریشن" میں ہلاک کیا ہے۔

ایک اور سیاق میں، سرکاری ایرانی ذرائع ابلاغ نے اطلاع دی ہے کہ ایران نے اسرائیلی بمباری کے جاری رہنے کے باعث تمام ڈاکٹروں اور نرسوں کو ان کی تعطیلات سے واپس بلا لیا ہے۔

ادھر، اصفہان کے نائب گورنر نے اعلان کیا ہے کہ نطنز کی جوہری تنصیب کے قریب ایک اسرائیلی ڈرون کو مار گرایا گیا ہے۔ تسنیم نیوز ایجنسی کے مطابق، اصفہان کے نائب گورنر نے کہا کہ "کاشان کے علاقے میں اسرائیلی ڈرون کو پاسدارانِ انقلاب کے ایئر اینڈ اسپیس ڈویژن سے تعلق رکھنے والے سوم خرداد فضائی دفاعی نظام کے ذریعے مار گرایا گیا۔" انھوں نے وضاحت کی کہ "یہ کارروائی نطنز جوہری مرکز کے گرد قائم فضائی دفاعی حلقے میں انجام دی گئی" اور اس "دشمن ڈرون کو مکمل طور پر تباہ کر دیا گیا"۔