تونس: راشد الغنوشی کو ریاست کے خلاف سازش کے مقدمے میں 14سال قید

تونس کی ایک عدالت نے منگل کے روز النہضہ پارٹی کے سربراہ راشد الغنوشی کو "ریاست کے خلاف سازش 2" کے مقدمے میں 14 برس قید کی سزا سنا دی۔

مقامی ذرائع ابلاغ کے مطابق عدالت نے اس مقدمے میں ملوث مزید 20 افراد کو سخت سزائیں سنائیں، جن میں نمایاں سیاسی و سکیورٹی شخصیات شامل ہیں۔ ان سزاؤں کی مدت 12 سے لے کر 35 برس تک ہے۔

راشد الغنوشی ان ملزمان میں شامل تھے جو اس مقدمے میں پہلے ہی زیر حراست تھے۔ ان کے ہمراہ النہضہ کے سینئر رہنما حبیب اللوز اور سابق انٹیلی جنس چیف محرز الزواری بھی شامل ہیں۔

سابق وزیراعظم اور دیگر افراد بھی ملزم

اس کیس میں مطلوب دیگر افراد میں سابق وزیراعظم یوسف الشاہد، صدارتی دفتر کی سابق سربراہ نادیہ عکاشہ، النہضہ کے رہنما رفیق بوشلاکہ اور کئی سکیورٹی و سیاسی شخصیات شامل ہیں جو اس وقت ملک سے باہر مقیم ہیں۔

سنگین الزامات

عدالت کے انسداد دہشت گردی کے شعبے سے متعلق فوجداری شعبے نے ان تمام ملزمان پر سنگین الزامات عائد کیے، جن میں ریاست کے داخلی امن کے خلاف سازش، مجرمانہ گروہ کی تشکیل اور دہشت گردی پر اکسانا شامل ہے۔

النہضہ کی جانب سے ردعمل

النہضہ تحریک نے اس فیصلے پر ردعمل دیتے ہوئے ایک بیان میں سزاؤں کو مسترد کیا ہے۔اس کا کہنا ہے کہ یہ کیس مخالفین کو دبانے اور آوازیں خاموش کرنے کی ایک منظم مہم کا حصہ ہے، جیسا کہ ان کے بقول، "گمراہ کن اور منظم مہم" جاری ہے۔

پہلے سے موجود سزائیں

واضح رہے کہ راشد الغنوشی اپریل 2023ء سے زیر حراست ہیں اور ان پر اس سے قبل بھی متعدد مقدمات میں سزائیں سنائی جا چکی ہیں۔ ان میں "انستالینگو" کیس میں 22 برس قید، "لوبیئنگ معاہدوں" کے کیس میں تین برس قید اور دہشت گردی کی تعریف سے متعلق بیانات پر 15 ماہ قید کی سزائیں شامل ہیں۔

مذکورہ کیسز کی تفتیش میں متعدد صحافی، بلاگرز، آزاد پیشہ ور افراد، سیاستدان، الغنوشی کی بیٹی اور داماد رفیق عبدالسلام اور وزارت داخلہ کے سابق ترجمان محمد علی العروی بھی شامل رہے۔