سعودی عرب نے یمن کو 1.38 ارب ریال کی مالی امداد فراہم کردی

سعودی عرب نے یمن کے لیے ایک نیا اور اضافی امدادی پیکیج فراہم کیا ہے جس کی مالیت 1 ارب 380 ملین 250 ہزار سعودی ریال سے زیادہ ہے۔

یہ امداد سعودی پروگرام برائے ترقی و تعمیر یمن (SPDRY) کے ذریعے شاہ سلمان بن عبدالعزیز اور ولی عہد شہزادہ و وزیراعظم محمد بن سلمان کی ہدایت پر دی گئی ہے۔ اس کے تحت ملک کی مشکل اقتصادی صورتحال میں یمنی عوام کی مدد کی گئی ہے۔

سعودی وزارت خارجہ کی جانب سے جاری بیان میں واضح کیا گیا ہے کہ یہ امداد یمنی صدارتی کونسل کے سربراہ ڈاکٹر رشاد العلیمی کی درخواست کے جواب میں ہے اور یمنی حکومت کی حمایت اور اس کے اقتصادی استحکام کو برقرار رکھنے کے لیے مملکت کے پختہ موقف کی تصدیق کرتی ہے۔

بیان میں یہ بھی کہا گیا ہے کہ یہ امداد حکومتی بجٹ میں حصہ ڈالنے، تیل کی مصنوعات کی حمایت کرنے اور عدن صوبے میں شہزادہ محمد بن سلمان ہسپتال کے آپریشنل بجٹ کی حمایت پر مشتمل ہے۔ یہ سب کچھ برادر یمنی عوام کے لیے سلامتی، استحکام اور ترقی کو یقینی بنانے کے لیے مملکت کی گہری خواہش کا حصہ ہے۔