امریکی صدر ڈونلڈ ٹرمپ کا دورہ اسرائیل، غزہ میں جنگ کے اختتام کے اعلان کے بعد کنیسٹ سے خطاب

امریکی صدر ڈونلڈ ٹرمپ پیر کے روز اسرائیلی پارلیمنٹ (کنیسٹ) کے اجلاس میں شریک ہوئے، جہاں ارکان نے ان کا کھڑے ہو کر استقبال کیا۔ اس موقع پر اسرائیلی صدر اسحق ہرتزوگ بھی موجود تھے۔

پارلیمنٹ کے احاطے میں پہنچنے پر صدر ٹرمپ نے مہمانوں کی کتاب میں تاثرات درج کرتے ہوئے کہا کہ “یہ میرے لیے بہت بڑا اعزاز ہے، آج ایک عظیم دن ہے، ایک نئی شروعات کا دن”۔ اس کے بعد انہوں نے اسرائیلی وزیراعظم بنجمن نیتن یاھو سے ملاقات کی۔

کنیسٹ سے خطاب کرتے ہوئے صدر ٹرمپ نے کہا کہ’یہ اسرائیل اور پوری دنیا کے لیے ناقابلِ یقین کامیابی ہے کہ اتنی زیادہ اقوام امن کے شراکت دار کے طور پر اکٹھی ہوئی ہیں۔ آنے والی نسلیں اسے اس لمحے کے طور پر یاد رکھیں گی جب سب کچھ بدلنا شروع ہوا"۔

انہوں نے کہاکہ “ہم نے ثابت کیا ہے کہ امن کوئی خواب نہیں، بلکہ ایک حقیقت ہے جس پر ہم روز بروز، فرداً فرداً، قوم بہ قوم تعمیر کر سکتے ہیں"۔

صدر ٹرمپ نے زور دیا کہ "غزہ کے عوام کو اب اپنی توجہ استحکام، سلامتی، عزتِ نفس اور اقتصادی ترقی کی بحالی پر مرکوز کرنی چاہیے تاکہ ان کے بچے ایک بہتر زندگی حاصل کر سکیں جس کے وہ مستحق ہیں"۔

انہوں نے مزید کہاکہ "یہاں تک کہ ایران کے لیے بھی دوستی اور تعاون کا ہاتھ ہمیشہ بڑھا ہوا ہے اور میرا یقین ہے کہ مشرقِ وسطیٰ کے ممالک کے درمیان امن اور باہمی احترام پروان چڑھ سکتا ہے"۔

صدر ٹرمپ پیر کو ایک مختصر دورے پر اسرائیل پہنچے، یہ دورہ اس وقت ہوا جب غزہ سے کچھ اسرائیلی مغویوں کی رہائی عمل میں آئی۔ ان کی آمد سے قبل انہوں نے کہا تھا کہ “غزہ میں جنگ ختم ہو چکی ہے۔ بعد ازاں وہ مصر کے شہر شرم الشیخ جائیں گے جہاں وہ "امن سمٹ" یعنی امن کانفرنس کی صدارت کریں گے۔

امریکی صدارتی طیارہ جب تل ابیب کے بن گوریون ہوائی اڈے پر اترا تو اسرائیلی صدر اسحق ہرتزوگ اور وزیراعظم بنجمن نیتن یاھو نے ان کا استقبال کیا۔

طیارے میں صحافیوں سے گفتگو کرتے ہوئے ٹرمپ نے کہاکہ ’جنگ ختم ہو چکی ہے، سمجھ گئے؟” انہوں نے اس اعتماد کا اظہار کیا کہ جنگ بندی برقرار رہے گی۔ واشنگٹن سے روانگی کے وقت انہوں نے اپنے دورۂ مشرقِ وسطیٰ کو “انتہائی خصوصی” قرار دیا۔

انہوں نے بتایا کہ انہیں عرب اور اسلامی ممالک کی جانب سے زبانی ضمانتیں ملی ہیں جن پر وہ اعتماد کرتے ہیں اور کہا کہ “غزہ میں بین الاقوامی امن فورس کی ذمہ داری سب ممالک کی ہوگی"۔

ٹرمپ نے واضح کیاکہ ہم اس بات کو یقینی بنائیں گے کہ غزہ میں جنگ بندی قائم رہے۔ ان کے اور نیتن یاھو کے درمیان بعض اختلافات ضرور تھے مگر وہ جلد ختم ہو گئے"۔

دوسری جانب اسرائیلی وزیراعظم بنجمن نیتن یاھو نے کہا کہ “غزہ سے مغویوں کی واپسی ایک تاریخی لمحہ ہے۔ ہم نے دنیا کو حیران کرنے والی کامیابیاں حاصل کی ہیں، مگر ابھی جنگ ختم نہیں ہوئی۔ انہوں نے اعتراف کیا کہ ابھی ہمارے سامنے بڑے سکیورٹی چیلنجز باقی ہیں، لیکن ہم ان کا مقابلہ کریں گے"۔

ٹرمپ بعد ازاں شرم الشیخ پہنچیں گے جہاں عالمی رہنماؤں کی موجودگی میں “غزہ کی جنگ کے خاتمے” سے متعلق دستاویز پر دستخط ہوں گے۔

صدر ٹرمپ نے بتایا کہ انہیں دونوں فریقوں اور خطے کے اہم ممالک سے زبانی ضمانتیں ملی ہیں۔ انہوں نے کہا کہ مجھے یقین ہے کہ کوئی بھی ہمیں مایوس نہیں کرے گا۔

ان کا کہنا تھا کہ "میرا نیتن یاھو کے ساتھ تعلق بہت اچھا ہے، اختلافات ہوئے مگر جلد ختم ہو گئے"

صدر ٹرمپ نے خواہش ظاہر کی کہ وہ غزہ کا دورہ کریں یا کم از کم اس کی سرزمین پر قدم رکھ سکیں۔ انہوں نے وعدہ کیا کہ “غزہ کے لیے نئی کونسل برائے امن” بہت جلد تشکیل دی جائے گی، جس کی صدارت وہ خود کریں گے۔

ٹرمپ کے منصوبے کے مطابق اسرائیل اپنی افواج کو بتدریج غزہ کے شہروں سے واپس بلائے گا اور ان کی جگہ ایک کثیرالقومی فورس تعینات کی جائے گی جس کا آپریشنل مرکز اسرائیل میں امریکی نگرانی میں ہوگا۔

امریکی منصوبے کے تحت ایک "فلسطینی ٹکنوکریٹ کمیٹی" تشکیل دی جائے گی جو کسی سیاسی جماعت سے وابستہ نہیں ہوگی اور اسے ایک عبوری بین الاقوامی اتھارٹی کے تحت رکھا جائے گا جس کی سربراہی صدر ٹرمپ کریں گے۔

غزہ کے صحت کے اداروں کے مطابق جنگ کے نتیجے میں تقریباً 68 ہزار افراد ہلاک ہوئے جن میں نصف سے زیادہ عورتیں اور بچے شامل ہیں، جب کہ جنوبی اسرائیل پر حماس کے حملے میں 1219 افراد ہلاک ہوئے۔