غزہ میں شہری دفاع نے بدھ کی صبح بتایا کہ گزشتہ روز غزہ کی پٹی کے مختلف علاقوں میں اسرائلی فضائی حملوں کے نتیجے میں کم از کم 30 فلسطینی جاں بحق ہو گئے۔
شہری دفاع کے ترجمان محود بصل کے مطابق امدادی ٹیمیں اب بھی ملبے تلے دبے افراد کو نکالنے میں مصروف ہیں۔
رپورٹوں کے مطابق اسرائیلی فوج نے تل الهوّا کے جنوب میں وزارت خزانہ کی سابقہ عمارت کو تباہ کر دیا، جس سے وہاں وسیع پیمانے پر نقصان ہوا۔
شہریوں کے مطابق اس عمارت میں بڑی تعداد میں وہ خاندان رہ رہے تھے جو جنگ کے دوران اپنے گھروں سے بے گھر ہو گئے تھے اور ان کے لیے متبادل پناہ گاہیں دستیاب نہیں تھیں۔
اسی طرح غزہ شہر کے وسط میں البریج کیمپ پر ایک اسرائیلی حملے میں 5 افراد جانوں سے ہاتھ دھو بیٹھے۔
یہ حملے اسرائیلی وزیر اعظم بنیامین نیتن یاہو کے حکم پر کیے گئے اور ان کا تعلق حماس پر فائر بندی کی خلاف ورزی کے الزامات سے جوڑا جا رہا ہے۔
حماس نے ان الزامات کی سختی سے تردید کی، جبکہ امریکی نائب صدر جے ڈی وینس نے کہا کہ 10 اکتوبر سے جاری فائر بندی اب بھی برقرار ہے، باوجود اس کے کہ کچھ چھوٹی جھڑپیں ہو رہی ہیں۔
نیتن یاہو کے دفتر نے کہا کہ یہ حملے حفاظتی مشاورت کے بعد کیے گئے۔
اسرائیلی وزیر دفاع یسرائیل کاتز نے حماس پر اپنی فوج پر حملہ کرنے کا الزام لگایا اور اسے خبردار کیا۔
ایک امریکی اہل کار کے مطابق، اسرائیل نے واشنگٹن کو پہلے سے اپنی حملوں کی نیت سے آگاہ کیا تھا اور امریکہ توقع رکھتا ہے کہ حملے محدود ہدف کے لیے ہوں گے۔ انھوں نے کہا کہ اسرائیل فائر بندی کو ختم کرنے کا ارادہ نہیں رکھتا۔ یہ بات امریکی اخبار "وال اسٹریٹ جرنل" نے بتائی۔
اسرائیلی نشریاتی ادارے کے مطابق اسرائیل نے حماس کو سزا دینے کے لیے یلو لائن کے اندر پیش قدمی کا فیصلہ کیا۔ یہ فیصلہ نیتن یاہو نے منگل کی شام امریکی حکام کے ساتھ حفاظتی مشاورت کے بعد کیا۔
امریکی اہل کار نے بتایا کہ صدر ٹرمپ کی انتظامیہ کے سینئر حکام نے نیتن یاہو کی ٹیم کو آگاہ کیا کہ حماس نے کوئی سنگین خلاف ورزی نہیں کی اور اسرائیل کو ایسا کوئی اقدام نہیں کرنا چاہیے جو فائر بندی کو خطرے میں ڈالے۔
