روسی سیاح خاتون کی دلیری کی وڈیو وائرل ... موبائل چھیننے والے لٹیرے کی ٹانگ سے لپٹ گئی

انٹرنیٹ پر ایک روسی نوجوان خاتون کی وڈیو وائرل ہوئی ہے جس نے اپنا موبائل فون چھین کر فرار ہونے کی کوشش کرنے والے دو مردوں کے خلاف غیر معمولی مزاحمت کا مظاہرہ کیا۔ یہ واقعہ ارجنٹائن کے دار الحکومت بیونس آئرس میں پیش آیا۔

وڈیو میں دیکھا گیا کہ نوجوان روسی خاتون سائیکل پر سوار ایک ٹریفک سگنل پر رکی ہوئی اپنے فون پر بات کر رہی تھی۔ اس دوران ایک موٹر سائیکل پر سوار دو افراد نے اس کے برابر میں آ کر لڑکی کے ہاتھ سے فون چھین لیا اور موٹر سائیکل بھگا دی۔

تاہم33 سالہ سیاح خاتون نے موٹر سائیکل پر پیچھے بیٹھے ہوئے لٹیرے کو مضبوطی سے پکڑ لیا اور آخر کار اسے موٹر سائیکل پر سے نیچے گرانے میں کامیاب ہو گئی، جبکہ دوسرا لٹیرا فرار ہو گیا۔

پولیس کے پہنچنے تک راہ گیر اس لڑکی کی مدد کے لیے رک گئے۔

مقامی میڈیا نے اطلاع دی ہے کہ پولیس نے اس شخص کو گرفتار کر لیا اور اس کے ساتھی کو چند گھنٹوں بعد شہر کے ایک علاقے سے حراست میں لے لیا گیا۔

ملزمان کے گھروں سے دس موبائل فون ملے ہیں۔