میکرون کی ابوظہبی میں فرانسیسی فوجیوں کی معیت میں فٹنس ورزشیں، ویڈیو وائرل

فرانسیسی صدر میکرون نے اپنے ملک کے فوجیوں کے ساتھ پریشر (پش اپس)، پلینک، گھٹنے اٹھانے کی مشقوں میں حصہ لیا، مشقوں کی رہنمائی ایک معروف فٹنس ٹرینر نے کی۔

سوشل میڈیا پر شائع ہونے والی ویڈیو میں میکرون کو ایک بکتر بند گاڑی کے سامنے فوجی پش اپس اور گھٹنے اٹھانے کی مشقیں کرتے ہوئے دکھایا گیا، بعد ازاں وہ فوجیوں کے ساتھ دوڑ میں بھی شریک ہوئے۔

یہ مناظر ابوظہبی میں فرانس کی افواج کے دورے کے دوران کے ہیں، یہی ان کی 48ویں سالگرہ کا دن بھی تھا۔ ویڈیو میں صدر کے ساتھ ٹیبو ڈیلابارٹ بھی نظر آئے، جو باڈی بلڈنگ کے معروف انسٹاگرام انفلوئنسر ہیں، اور صدر نے انہیں اپنے خلیجی دورے میں ساتھ لیا تھا۔

33 سالہ ڈیلابارٹ نے میکرون اور ان کے ساتھیوں کو حوصلہ دیتے ہوئے کہا: ''چلو، شکوے مت کرو'''۔ میکرون نے ویڈیو کے کیپشن میں لکھا: یہ ایک بہت بڑی عزت کی بات ہے کہ میں اپنی افواج کے ساتھ یہ لمحے گزار رہا ہوں۔ آپ سب کو خوشیوں بھرا موسم مبارک ہو۔

ویڈیو کو بارہ لاکھ سے زیادہ بار ویوز اور ہزاروں لائکس ملے۔ گذشتہ سال میکرون کی بلیک اینڈ وائٹ تصاویر بھی منظر عام پر آئیں، جن میں وہ پسینے میں شرابور، باکسنگ گلووز پہنے ہوئے، باکسنگ بیگ پر زوردار مکوں کی مشق کر رہے تھے۔

"دی ٹائمز" کے مطابق اس وقت میکرون یورپ میں روس کے خلاف سخت موقف اختیار کرنے کی تیاری کر رہے تھے۔

گذشتہ ہفتے میکرون نے یورپ کو امریکی-روسی امن کی کوششوں میں شامل کرنے کی کوشش کی اور یورپی یونین کی جانب سے پیوٹن کے ساتھ دوبارہ مذاکرات شروع کرنے کی تجویز پیش کی۔