جاپان کی وہ کمپنیاں جو لگژری ٹوائلٹس بنانے میں مہارت رکھتی ہیں اور اپنی جدید مصنوعات کے لیے مشہور ہیں، انھوںنے اپنی مصنوعات میں ایک نئی ٹیکنالوجی متعارف کرائی ہے جو ''پاخانے کا تجزیہ ''کر کے صارف کی صحت کی جانچ کرتی ہے، تاکہ وہ ایسے صارفین کو متوجہ کر سکیں جو اپنی صحت کے بارے میں محتاط ہیں۔
جاپانی خبر رساں ادارے Kyodo News نے اتوار کے روز اطلاع دی کہ کمپنی TOTO Ltd نے اگست میں اپنی لگژری ٹوائلٹس کی سیریز Neorest کے دو نئے ماڈلز لانچ کیے، جن میں ٹوائلٹ کے ٹب میں سینسر یونٹ نصب ہے، جو LED لائٹس والے آلے کے ذریعے پاخانے کی شکل، حجم اور رنگ کو اسکین کرتا ہے۔
یہ مصنوعات جاپان میں گھریلو استعمال کے لیے اپنی نوعیت کی پہلی ہیں۔ اس نظام کے ذریعے پاخانے کی شکل اور سختی کو سات درجات میں تقسیم کیا جاتا ہے، جبکہ حجم اور رنگ کو تین سطحوں پر ریکارڈ کیا جاتا ہے۔
صارفین اپنے فضلات کی حالت کو اس اسمارٹ فون ایپ کے ذریعے بھی مانیٹر کر سکتے ہیں، یہاں تک کہ آنتوں کی حرکت کے تجزیے کی بنیاد پر غذائی مشورے بھی حاصل کر سکتے ہیں، جیسے سبزیوں کا زیادہ استعمال کرنے کی سفارش۔
کمپنی کے ایک اہلکار نے بتایا کہ یہ نیا پروڈکٹ صارفین کی مدد کے لیے ڈیزائن کیا گیا ہے تاکہ وہ روزانہ کی بیت الخلاء کی عادات کو بہتر صحت کے حصول کا دروازہ بنا سکیں۔
