خلائی مخلوق کی فائلیں آ رہیں، اوباما نے خفیہ معلومات افشا کر کے غلطی کی: ٹرمپ

امریکی صدر ڈونلڈ ٹرمپ نے کہا ہے کہ وہ وفاقی ایجنسیوں کو خلائی مخلوق اور نامعلوم اڑنے والی اشیاء (یو ایف اوز) سے متعلق حکومتی فائلوں کی اشاعت شروع کرنے کی ہدایت جاری کریں گے۔ انہوں نے اس کی وجہ اس معاملے میں عوامی دلچسپی کو قرار دیا۔ سوشل میڈیا پر ایک پوسٹ میں ٹرمپ نے کہا کہ وہ وزیر دفاع پیٹ ہیگسیتھ اور دیگر ایجنسیوں کو معلومات جاری کرنے کے احکامات دیں گے۔ انہوں نے اسے انتہائی دلچسپ اور اہم معاملہ قرار دیا۔

اس سے قبل ٹرمپ نے سابق صدر براک اوباما پر خلائی مخلوق کے موضوع پر علانیہ گفتگو کرتے ہوئے خفیہ معلومات کو نامناسب طریقے سے افشا کرنے کا الزام لگایا اور کہا کہ اوباما نے بڑی غلطی کی ہے۔ ٹرمپ نے جارجیا جاتے ہوئے صحافیوں کو بتایا کہ اوباما نے اسے خفیہ معلومات کے زمرے سے نکال دیا ہے۔ انہیں ایسا نہیں کرنا چاہیے تھا۔ ہفتے کے روز شائع ہونے والے برائن ٹائلر کوہن کے ساتھ ایک انٹرویو کے دوران اوباما سے پوچھا گیا تھا کہ کیا خلائی مخلوق حقیقت ہے؟

اوباما نے جواب دیا کہ وہ حقیقت ہیں، لیکن میں نے انہیں نہیں دیکھا اور وہ ’’ایریا 51 ‘‘ میں قید نہیں ہیں۔ وہاں کوئی زیرِ زمین تنصیب نہیں ہے جب تک کہ کوئی بہت بڑی سازش نہ ہو اور انہوں نے اسے امریکہ کے صدر سے چھپا رکھا ہو۔ ’’ ایریا 51 ‘‘ نیواڈا کی ریاست میں فضائیہ کی ایک خفیہ تنصیب ہے اور کچھ لوگ قیاس کرتے ہیں کہ وہاں خلائی مخلوق کی لاشیں اور تباہ شدہ خلائی جہاز موجود ہیں۔

2013 میں شائع ہونے والے سی آئی اے کے ریکارڈز کے مطابق یہ انتہائی خفیہ جاسوس طیاروں کی آزمائش کی جگہ تھی۔ اتوار کی ایک پوسٹ میں اوباما نے اپنی بات کی وضاحت کرتے ہوئے کہا تھا کہ کائنات کی وسعت کو دیکھتے ہوئے زمین سے باہر زندگی کے امکانات زیادہ ہیں۔ انہوں نے مزید کہا کہ طویل فاصلوں کے پیشِ نظر خلائی مخلوق کے زمین پر آنے کے امکانات کم ہیں۔

ٹرمپ نے جمعرات کو اس سوال کے جواب میں کہ کیا انہوں نے خلائی مخلوق کے وجود کا کوئی ثبوت دیکھا ہے کہا: مجھے نہیں معلوم کہ وہ حقیقت ہیں یا نہیں۔ پینٹاگون کی جانب سے 2024 میں جاری کردہ ایک رپورٹ میں بتایا گیا ہے کہ دوسری جنگ عظیم کے خاتمے کے بعد سے امریکی حکومت کی تحقیقات میں خلائی ٹیکنالوجی کے وجود کا کوئی ثبوت نہیں ملا اور زیادہ تر مشاہدات عام اشیاء اور مظاہر تھے جنہیں غلط سمجھا گیا تھا۔