جنگ بندی زیادہ دیر تک قائم نہیں رہے گی، جب تک ایران حرکت نہیں کرتا:امریکی میڈیا

امریکی خبر رساں ادارے ''فاکس نیوز'' نے بدھ کے روز ذرائع کے حوالے سے بتایا ہے کہ امریکی صدر ڈونلڈ ٹرمپ کی جانب سے ایران کے ساتھ اعلان کردہ جنگ بندی میں توسیع ممکنہ طور پر مختصر مدت کے لیے ہوگی، جب تک کہ جلد کوئی معاہدہ طے نہ پا جائے۔

یہ اقدام پاکستان کے ثالثی کردار کے اعتراف کے طور پر کیا گیا ہے۔رپورٹ کے مطابق یہ جنگ بندی زیادہ دیر قائم نہیں رہ سکتی اگر فوری معاہدہ نہ ہو سکا، کیونکہ کشیدگی بدستور برقرار ہے، جس میں امریکی بحری ناکہ بندی اور اس کے ایرانی معیشت پر اثرات بھی شامل ہیں۔

فاکس نیوز نے مزید کہا کہ یہ اقدام ایرانی عوام کے لیے امن کی آخری کوشش ہے، جو جنگ سے بری طرح متاثر ہو چکے ہیں، تاہم اس سے ایرانی حکومت کو اندرونی رابطے اور مشاورت کے لیے کچھ مزید وقت مل گیا ہے۔

رپورٹ میں یہ بھی بتایا گیا کہ موجودہ حالات میں ایران کے اندر رابطے کرنا آسان نہیں، کیونکہ امریکہ کی شدید انٹیلی جنس اور فوجی نگرانی کی وجہ سے صورتحال مزید پیچیدہ ہو گئی ہے۔

یہاں تک کہ ایرانی قیادت کے لیے عام رابطے جیسے فون استعمال کرنا بھی خطرناک سمجھا جا رہا ہے۔

امریکی صدر ڈونلڈ ٹرمپ نے کہا ہے کہ جنگ بندی اس وقت تک جاری رہے گی، جب تک ایران کی جانب سے کوئی باضابطہ تجویز پیش نہیں کی جاتی اور مذاکرات مکمل نہیں ہو جاتے۔ انہوں نے یہ فیصلہ پاکستان کی درخواست پر کیا تاکہ فریقین کو امن معاہدے تک پہنچنے کا موقع مل سکے۔