امریکی سینیٹر نے ایران کے خلاف ٹرمپ کی فوجی کارروائی کی ایک وجہ بتا دی

امریکی سینیٹر جون کینیڈی نے کہا ہے کہ ایران نے امریکہ اور دنیا کو دھمکانے کے لیے "پہلے میزائل" پر مبنی فوجی حکمت عملی اپنا لی ہے۔ انہوں نے اس بات پر زور دیا کہ امریکی صدر ڈونلڈ ٹرمپ نے اس راستے کو عالمی خطرے میں بدلنے سے روکنے کے لیے بروقت مداخلت کی۔

بدھ کے روز امریکی چینل "فوکس نیوز" کو دیے گئے ایک انٹرویو کے دوران کینیڈی نے واضح کیا کہ امریکہ نے گذشتہ جون میں حساس تنصیبات کو نشانہ بنانے والی فوجی ضربوں کے ذریعے "ایران کے جوہری ہتھیاروں کے پروگرام کا بیشتر حصہ تباہ کر دیا تھا"۔ انہوں نے مزید کہا کہ بعد ازاں انٹیلی جنس اداروں نے ایرانی حکمت عملی میں تبدیلی کا مشاہدہ کیا۔

کینیڈی نے کہا کہ انٹیلی جنس جائزوں کے مطابق تہران ایک ایسے منصوبے کی طرف منتقل ہو گیا ہے جو بڑی تعداد میں بیلسٹک میزائلوں، کروز میزائلوں اور ڈرونز کی تیاری اور ذخیرہ اندوزی پر منحصر ہے۔ اس کا مقصد ایک ایسی دفاعی قوت تشکیل دینا ہے جو خطے اور یورپ کو دھمکانے کی صلاحیت رکھتی ہو۔

امریکی سینیٹر کا مزید کہنا تھا "امریکیوں کے لیے ان (ایرانیوں) کا ممکنہ پیغام یہ تھا کہ : آپ ہمارے جوہری پروگرام پر دوبارہ بم باری کر سکتے ہیں، لیکن ہم اپنے میزائلوں کے ذخیرے سے مشرق وسطیٰ کو ختم کر دیں گے اور وقت گزرنے کے ساتھ ہم برلن، لندن اور پیرس کو نشانہ بنانے کے قابل ہو جائیں گے"۔

ریپبلکن سینیٹر نے اس بات پر زور دیا کہ واشنگٹن ایسا ہونے کی اجازت نہیں دے سکتا تھا۔ انھوں نے واضح کیا کہ ٹرمپ نے "ایران کو عالمی خطرہ بننے کی اجازت نہیں دی"۔

کینیڈی امریکی سینیٹ کی متعدد با اثر کمیٹیوں کے رکن ہیں، جن میں تخصیصات کمیٹی، جوڈیشری کمیٹی، بینکنگ، ہاؤسنگ اور شہری امور کی کمیٹی کے علاوہ بجٹ کمیٹی شامل ہے۔ یہ انہیں قومی سلامتی، دفاعی اخراجات اور اقتصادی پالیسیوں کے معاملات میں براہ راست کردار فراہم کرتی ہے۔

فوکس نیوز کی رپورٹ کے مطابق کینیڈی کا یہ بیان امریکہ کے اندر ایران کے خلاف فوجی دفاع کے مستقبل اور مشرق وسطیٰ میں تناؤ کی حدت بڑھنے کے امکانات پر جاری بحث کے دوران سامنے آیا ہے۔