.

"حلب پر داعش کا کیمیائی ہتھیاروں سے حملہ"

پہلی اشاعت: آخری اپ ڈیٹ:

ڈاکٹروں کی بین الاقوامی خیراتی تنظیم 'ڈاکٹرز ود آؤٹ بارڈرز' نے تصدیق کی ہے کہ شام میں داعش اور دیگر مسلح گروپوں کے درمیان لڑائی سے متاثرہ ایک خاندان کے افراد میں کیمیائی اثرات پائے گئے ہیں۔

تنظیم کے ایک بیان کے مطابق دو بالغ، ایک تین سالہ اور پانچ روزہ شیر خوار بچی کو شمالی شام کے صوبے حلب میں تنظیم کے زیر انتظام ہسپتال میں علاج کے لئے لایا گیا تھا۔

بیان میں بتایا گیا کہ انہیں حملے کے صرف ایک گھنٹے بعد ہی تنظیم کے ہسپتال میں منتقل کردیا گیا تھا جہاں ان کا سانس لینے میں دشواری، جلدی سوجن اور آشوب چشم جیسے امراض کا علاج کیا گیا۔ اس کے تین گھنٹے بعد ان کے جسم پر چھالے بن گئے اور انہیں سانس لینا دوبھر ہو گیا۔

ہسپتال کے عملے نے انہیں فوری طور پر ابتدائی طبی امداد فراہم کی، جس کے بعد انہیں ایک اور ہسپتال میں منتقل کر دیا جہاں اس قسم کے علاج کے خصوصی سہولیات موجود ہیں۔

یہ خاندان حلب کے شمال میں واقع قصبے ماریا سے آئے تھے جہاں پر داعش نے ابھی حال ہی میں شامی باغیوں کے خلاف ایک نیا معرکہ شروع کیا ہے۔ ترکی کی سرحد سے صرف 20 کلومیٹر کی مسافت پر واقع اس قصبے پر گذشتہ ایک ہفتے سے مسلسل گولا باری اور مارٹر حملے جاری ہیں۔

شام میں ایم ایس ایف کے پروگرام مینیجر پابلو مارکو نے کہا "اگر اس لڑائی میں واقع ہی کیمیائی ہتھیار کا استعمال کیا گیا ہے تو ہمارے لئے یہ پتہ لگانا مشکل ہو گا کہ اس حملے کا ذمہ دار کون ہے۔"

خاندان کے مطابق جمعہ کی شام کو ان کے گھر پر ایک مارٹر گولا گرا۔ دھماکے کے بعد ان کے گھر میں پیلے رنگ کی گیس بھر گئی تھی۔ پابلو مارکو کا کہنا تھا "ہماری تنظیم کے پاس ابھی تک ان بیماریوں کے موجب کا کوئی لیبارٹری سے ثبوت نہیں ہے۔ مگر ان مریضوں میں دیکھی جانی والی ظاہری علامات، ان میں وقت کے ساتھ تبدیلی اور مریضوں کی جانب سے دئیے جانے والے بیانات سب ہی کیمیائی حملے کی طرف ہی اشارہ کرتے ہیں۔

شامی کرد ملیشیا اور شام میں جاری تنازعے پر نظر رکھنے والے ایک مانیٹرنگ گروپ کے مطابق داعش نے ماہ جون میں شمال مشرقی شام میں کردوں کے زیر قبضہ علاقوں پر حملے میں زہریلی گیس کا استعمال کیا تھا۔

ایک امریکی جنرل نے گذشتہ جمعہ کو ایک بیان میں بتایا تھا کہ داعش کے جنگجوئوں کی جانب سے کرد باغیوں پر داغے جانے والے مارٹر گولوں کے ٹکڑوں کا امریکی فوج کی جانب سے جائزہ لینے پر ان میں سے سلفر مسٹرڈ کے اثرات ملے ہیں جو کہ ہتھیاروں میں استعمال ہونیوالا کیمیائی ایجنٹ ہے۔