حلب کے ساتھ اظہار یک جہتی.. ایفل ٹاور کی بتیاں گُل کر دی گئیں

شام کے شہر حلب کے اہلیان کے ساتھ یک جہتی کے اظہار کے واسطے بدھ کی شام پیرس کے ایفل ٹاور کی بتیاں بجھا دی گئیں۔ سنگین نوعیت کے انسانی بحران سے دوچار حلب شہر سے مقامی آبادی کے فرار کا سلسلہ جاری ہے۔

پیرس کی میئر آن ایڈال جو کا کہنا ہے کہ ایفل ٹاور کے ہزاروں برقی قمقموں کو بجھا دینا دنیا بھر میں معروف ڈھانچے کے حوالے سے ایک علامتی اقدام ہے.. جس کا مقصد ایک مرتبہ پھر سے عالمی برادری کو اس جانب متوجہ کرنا ہے کہ حلب کی آبادی کو بچانے کے لیے تیزی سے متحرک ہونے کی ضرورت ہے۔

دوسری جانب ایفل ٹاور میں کام کرنے والے کارکنان کی ہڑتال کے باعث مشہورِ زمانہ ٹاور کو بدھ کے روز دن کے اوقات میں بند کر دیا گیا۔