شام میں "غصن الزيتون" آپریشن میں ترکی کا پہلا فوجی ہلاک

ترکی کی فوج نے پیر کی شام ایک اعلان میں بتایا کہ شام کے شمال میں کرد اہداف پر حملوں کے تیسرے روز اُس کا پہلا فوجی اہل کار ہلاک ہو گیا۔

فوج کی جانب سے جاری بیان کے مطابق مذکورہ فوجی ترکی کے سرحدی شہر گل بابا کے جنوب مشرق میں پیپلز پروٹیکشن یونٹس کے مسلح کرد ارکان کے ساتھ جھڑپوں میں مارا گیا۔

ترکی کی فوج نے ہفتے کے روز "غصن الزيتون" فوجی آپریشن کا آغاز کیا تھا جو شام میں سات برسوں سے جاری خانہ جنگی میں دوسری مرکزی مداخلت ہے۔

آپریشن میں ترکی کے لڑاکا طیارے اور توپ خانے شریک ہیں جب کہ بڑے زمینی حملے میں انقرہ کے حمایت یافتہ شامی اپوزیشن کے جنگجو بھی شامل ہیں۔ آپریشن کا مقصد شام کے علاقے عفرین میں کرد پیپلز پروٹیکشن یونٹس کا خاتمہ ہے۔

ترکی مذکورہ کرد یونٹس کو کردستان ورکرز پارٹی کی شاخ شمار کرتا ہے جس نے کئی دہائیوں سے ترک ریاست کے خلاف علمِ بغاوت بلند کر رکھا ہے۔

ترکی نے شام کے علاقے عفرین کے مشرق میں کرد پیپلز پروٹیکشن یونٹس کے خلاف پہلا حملہ اگست 2016 میں کیا تھا۔ اس آپریشن کا نام "فرات کی ڈھال" تھا جو مارچ 2017 تک جاری رہا۔

واضح رہے کہ مذکورہ آپریشن میں ترکی کے 72 فوجی ہلاک ہوئے تھے۔