شام : خود کش حملے میں 2 امریکی فوجی زخمی اور 8 کُرد ہلاک

شام میں انسانی حقوق کے نگراں گروپ المرصد کے مطابق ایک امریکی فوجی قافلے کو خود کش دھماکے کا نشانہ بنایا گیا جس کے نتیجے میں دو امریکی فوجی زخمی ہو گئے جب کہ ان کے ہمراہ موجود 8 کرد اپنی جانوں سے ہاتھ دھو بیٹھے۔

المرصد نے بتایا کہ شام کے شمال مشرق میں الحسکہ کے نزدیک ایک خود کش حملہ آور نے گولہ بارود سے بھری گاڑی کو امریکی قافلے کے نزدیک دھماکے سے اڑا دیا۔

گزشتہ ایک ہفتے کے اندر یہ اپنی نوعیت کا دوسرا حملہ ہے۔ چند روز قبل امریکی عہدے دار نے شمالی شام کے شہر منبج میں ہونے والے ایک دھماکے میں 4 امریکی فوجیوں کے ہلاک ہونے اور 3 کے زخمی ہونے کا اعلان کیا تھا۔ بدھ کے روز ایک ریستوران میں ہونے والے خود کش بمبار کے اس حملے میں کم از کم 15 افراد مارے گئے تھے۔ منبج شہر کرد اور عرب جنگجوؤں کے زیر کنٹرول ہے۔