سعودی عرب کی وزارت خارجہ نے قابض اسرائیلی فوج کی جانب سے شمالی غزہ کے علاقے بیت لاھیا میں بے گھر افراد پر مشتمل سکول پر بمباری کی شدید الفاظ میں مذمت کی ہے۔
سعودی عرب کی وزارت خارجہ کی طرف سے جاری ایک پریس بیان میں کہا گیا ہےکہ فلسطینی پناہ گزینوں کی ریلیف اینڈ ورکس ایجنسی کے زیراہتمام چلنے والےسکول پر ابو عاصی پر بمباری اور شہری آبادی کے زیراستعمال تنصیبات کو نشانہ بنانے کی سخت ترین الفاظ میں مذمت کی ہے۔
مملکت نے بین الاقوامی برادری کی خاموشی پر تنقید کرتے ہوئے عالمی اداروں اور عالمی برادری پر زور دیا کہ وہ قابض اسرائیل کو شہریوں، امدادی اور انسانی ہمدردی کے اداروں کو مسلسل نشانہ بنانے کےحوالے سے دو ٹوک موقف اختیار کرے اور اسرائیلی ریاست کی نہتے فلسطینیوں کے قتل عام کی روک تھام کے لیے اپنا کردار ادا کریں۔
خیال رہے کہ گذشتہ روز شمالی غزہ میں ابو عاصی سکول پر اسرائیلی فوج کی بمباری کے نتیجے میں 70 سے زیادہ فلسطینی شہید اور دسیوں زخمی ہوگئے تھے۔
