شام کے ساتھ سرحد کی صورتحال تشویش ناک ہے: عراقی صدر

اس وقت جب بغداد 17 مئی کو متوقع عرب لیگ کے سربراہی اجلاس کی میزبانی کی تیاری کر رہا ہے تو اسی دوران عراقی صدر عبداللطیف رشید نے واضح کیا ہے کہ کئی مسائل زیر بحث آئیں گے۔ انہوں نے ’’العربیہ‘‘ کو دیے گئے ایک انٹرویو میں ہفتہ کو کہا تھا کہ ہمارے خطے میں کئی مسائل ہیں جن پر بغداد میں متوقع سربراہی اجلاس میں تبادلہ خیال کیا جائے گا۔ ان مسائل کے حوالے سے اچھے فیصلے جاری کیے جائیں گے لیکن سب سے اہم ان فیصلوں پر عمل درآمد اور ان پر عمل کرنا ہے۔

انہوں نے مزید کہا کہ بغداد خطے کے مختلف فریقین کے درمیان کشیدگی کو کم کرنے اور مسائل حل کرنے میں مدد کے لیے کام کر رہا ہے۔ انہوں نے زور دیا کہ عرب لیگ کے سربراہی اجلاس میں سب کی شرکت ضروری ہے۔ انہوں نے مزید کہا کہ عراق تمام رہنماؤں، صدور اور قائدین کا خیرمقدم کرتا ہے۔

شام اہم ہے

شام کی سربراہی اجلاس میں شرکت کی سطح کے بارے میں انہوں نے کہا کہ یہ شامی قیادت کا معاملہ ہے۔ انہوں نے زور دیا کہ شام عراق اور پورے خطے کے لیے ایک پڑوسی، دوست اور اہم ملک ہے۔ انہوں نے امید ظاہر کی کہ عرب اور بین الاقوامی تنہائی کے برسوں بعد شام کے عوام امن اور استحکام سے لطف اندوز ہوں گے۔ انہوں نے شام میں ہونے والی تبدیلی کا خیرمقدم کرتے ہوئے امید ظاہر کی کہ نئی حکومت تمام شامی گروہوں، قومیتوں اور اجزاء کی سیاسی عمل میں شرکت اور تمام شہریوں کے حقوق کا احترام یقینی بنائے گی۔

شام اور عراق کی سرحد

امریکی فوجیوں کی موجودگی کے حوالے سے انہوں نے کہا ہے کہ داعش سے لڑنے کے لیے شامی سرحد پر ان کی موجودگی بہت ضروری ہے۔ انہوں نے شام کے ساتھ مشترکہ سرحد پر موجود بعض گروہوں پر اپنی تشویش کا اظہار بھی کیا اور اس مسئلے کو حل کرنے کے لیے فریقین کے درمیان رابطے کی ضرورت پر زور دیا۔

انہوں نے شام کے اندرونی معاملات میں کسی بھی بیرونی مداخلت کو مسترد کرتے ہوئے شامی فیصلے کی آزادی کو برقرار رکھنے کی ضرورت پر زور دیا اور اس بات کا اعادہ کیا کہ شام کی سلامتی عراق کی سلامتی سے منسلک ہے۔ خاص طور پر طویل مشترکہ سرحد کے پیش نظر شام کی سلامتی عراق کی سلامتی سے منسلک ہے۔ عراق کے وزیر داخلہ عبدالامیر الشمری نے گزشتہ منگل کو "العربیہ " کے ساتھ ایک گفتگو میں واضح کیا تھا کہ عراق کا اب تک شامی وزارت داخلہ کے ساتھ کوئی سکیورٹی تعاون نہیں ہے۔

واضح رہے 8 دسمبر 2024 کو شام کے سابق صدر بشار الاسد کے نظام کے خاتمے کے بعد سے عراقی حکام نے داعش یا دیگر انتہا پسند مسلح گروہوں کے عناصر کی دراندازی کے خوف سے شام کے ساتھ سرحد پر سکیورٹی سخت کر دی ہے۔