اریٹیریائی جڑی ہوئی بچیوں کی علاحدگی کا آپریشن ، سعودی عرب کی کامیابیوں میں نیا سنگ میل

ڈاکٹر عبد اللہ الربیعہ، اریٹریا کی جڑی ہوئی جڑواں بچیوں (اسماء اور سمیہ) کو علاحدہ کرنے کا آپریشن انجام دینے والی طبی ٹیم کے سربراہ ہیں۔ ان کا کہنا ہے کہ یہ آپریشن سعودی عرب کی اس شعبے میں کامیابیوں کے ریکارڈ میں ایک نیا سنگ میل ہے۔ انھوں نے بتایا کہ یہ سر سے جڑے ہوئے بچوں کے علاحدہ کرنے کا چھٹا کیس ہے جب کہ اس سلسلے میں سعودی پروگرام کے تحت یہ مجموعی طور پر 64 واں آپریشن ہے۔

ڈاکٹر الربیعہ نے "الاخباريہ" چینل سے بات کرتے ہوئے بتایا کہ کچھ دیر قبل جڑواں بچیوں کو سر سے علیحدہ کر دیا گیا، اور یہ پیچیدہ آپریشن سعودی پروگرام کی ماہر ٹیم نے انجام دیا ہے۔ ڈاکٹر الربیعہ نے بتایا کہ یہ آپریشن آٹھ مراحل پر مشتمل تھا اور تقریباً 15 گھنٹے تک جاری رہا، کیوں کہ جڑواں بچیوں میں نہ صرف سر کی ہڈی بلکہ خون کی وریدیں اور شریانیں بھی مشترکہ تھیں، جس کی وجہ سے یہ عمل بہت پیچیدہ تھا۔