سعودی پریس ایجنسی نے بدھ کو اطلاع دی کہ خلیجی عرب ریاستوں کے وزرائے خارجہ نے قطر میں امریکی فوجی مرکز پر ایران کے میزائل حملے کی شدید مذمت کرتے ہوئے اسے خودمختاری کی "صریح، ناقابلِ قبول اور خطرناک" خلاف ورزی قرار دیا۔
بیان کے مطابق خلیج تعاون کونسل (جی سی سی) نے "اسلامی جمہوریہ ایران کی جانب سے ریاست قطر میں ایک فوجی مرکز پر میزائل حملوں پر گہرے افسوس اور شدید مذمت کا اظہار کیا ہے۔"
وزراء نے اس حملے کو "جھوٹے حیلے بہانوں اور جوازوں سے قطع نظر بین الاقوامی قانون اور اقوامِ متحدہ کے منشور کی صریح خلاف ورزی" قرار دیا اور "قطر کی ریاست کے ساتھ مکمل یکجہتی اور اُن اقدامات کی حمایت کا اعادہ کیا جو اس کی سلامتی اور استحکام کے تحفظ کے لیے کیے جائیں گے۔"
مزید برآں کونسل نے امریکی صدر ڈونلڈ ٹرمپ کی طرف سے اسرائیل اور ایران کے درمیان جنگ بندی کے اعلان کا خیرمقدم کیا اور اسے کشیدگی میں کمی کی جانب ایک اہم قدم قرار دیا۔
انہوں نے "زیادہ سے زیادہ تحمل" اور "پائیدار حل کی طرف لے جانے والے مذاکرات کی جانب سنجیدہ واپسی" کی اہمیت پر زور دیا۔
جی سی سی کے وزراء نے غزہ میں جاری اسرائیلی فوجی مہم سمیت دیگر اہم علاقائی مسائل پر بھی توجہ مرکوز کی۔
ایس پی اے کے مطابق انہوں نے "غزہ کی پٹی میں مسلسل اسرائیلی جارحیت اور شہریوں کے قتل کی مذمت کی" اور "قابض حکام کی طرف سے فوجی کشیدگی" کے ساتھ ساتھ انسانی امداد کو روکنے والی ناکہ بندی کے خاتمے کا مطالبہ کیا۔
