ایلون مسک کی قائم کردہ کمپنی ایکس اے آئی کے تیار کردہ چیٹ بوٹ گروک نے منگل کے روز وہ سوشل میڈیا پوسٹس ہٹا دیں جنہیں اس نے "نامناسب" قرار دیا۔ یہ پوسٹس ایکس صارفین اور اینٹی ڈیفیمیشن لیگ کی ان شکایات کے بعد ہٹائی گئیں کہ گروک نے یہود دشمنی پر مبنی مواد تیار کیا اور ایڈولف ہٹلر کی تعریف کی۔
کم از کم 2022 میں اوپن اے آئی کا چیٹ جی پی ٹی شروع ہونے کے بعد سے سیاسی تعصب، نفرت انگیز تقریر اور اے آئی چیٹ بوٹس کی درستگی کے مسائل تشویش کا باعث بنے ہوئے ہیں۔
گروک نے ایکس پر پوسٹ کیا، "ہم گروک کی حالیہ پوسٹس سے آگاہ ہیں اور نامناسب پوسٹس ہٹانے کے لیے سرگرمِ عمل ہیں۔"
نیز کہا گیا، "مواد سے واقف ہونے کے بعد ایکس اے آئی نے ایکس پر گروک کی پوسٹس کرنے سے پہلے نفرت انگیز تقریر پر پابندی لگانے کے لیے کارروائی کی ہے۔ ایکس اے آئی صرف حق کی تلاش کرنے کی تربیت دے رہا ہے اور ایکس کے لاکھوں صارفین کی بدولت ہم فوری طور پر اس ماڈل میں شناخت اور اپ ڈیٹ کر سکتے ہیں تاکہ اسے بہتر بنایا جا سکے۔"
یہود دشمنی کا مقابلہ کرنے کے لیے بنائی گئی غیر منافع بخش تنظیم اے ڈی ایل نے گروک اور بڑے لینگویج ماڈل سافٹ ویئر کے دوسرے تیار کنندگان جو انسانی آواز کا متن تیار کرتے ہیں، پر زور دیا کہ وہ "یہود دشمنی اور انتہا پسندانہ تقریف پر مبنی مواد تیار کرنے" سے گریز کریں۔
اے ڈی ایل نے ایکس پر کہا، "سادہ بات یہ ہے کہ ہم اس وقت گروک ایل ایل ایم پر جو کچھ دیکھ رہے ہیں وہ غیر ذمہ دارانہ، خطرناک اور یہود دشمنی پر مبنی ہے۔ انتہا پسندانہ بیان بازی کی یہ اشتعال انگیزی صرف یہود دشمنی کا فروغ اور حوصلہ افزائی کرے گی جو پہلے ہی ایکس اور کئی دوسرے پلیٹ فارمز پر بڑھ رہی ہے۔"
مئی میں جب صارفین نے دیکھا کہ گروگ نے دوسرے معاملات کے بارے میں غیر متعلقہ بات چیت میں جنوبی افریقہ میں "سفید فام نسل کشی" کا موضوع اٹھایا تو ایکس اے آئی نے اسے ایک غیر مجاز تبدیلی سے منسوب کیا جو گروک کے جوابی سافٹ ویئر میں کی گئی تھی۔
مسک نے گذشتہ مہینے گروک کو اپ گریڈ کرنے کا وعدہ کرتے ہوئے کہا تھا، "غیر درست ڈیٹا پر تربیت یافتہ کسی بھی فاؤنڈیشن ماڈل میں بہت زیادہ کچرا تھا۔"
منگل کو گروک نے کہا کہ ہٹلر سفید فاموں کے خلاف نفرت کا مقابلہ کرنے کے لیے بہترین ہوتا اور کہا، وہ اس "نمونہ کی تلاش اور اسے فیصلہ کن طریقے سے سنبھال لیتا۔"
گروک نے ہٹلر کو مثبت طور پر "تاریخ کا مونچھوں والا آدمی" بھی کہا اور دیگر تنقیدی پوسٹس کے ساتھ تبصرہ کیا کہ یہودی کنیت والے لوگ انتہائی سفید فام مخالف سرگرمی کے ذمہ دار تھے۔
گروک نے ایک موقع پر تسلیم کیا کہ اس نے ایک عام یہودی کنیت والے جعلی اکاؤنٹ سے پوسٹ کیے گئے تبصروں کا جواب دے کر "غلطی" کی۔ مذکورہ جعلی اکاؤنٹ نے ٹیکساس کے نوجوان سیلاب متأثرین کو "مستقبل کے فسطائیوں" کے طور پر تنقید کا نشانہ بنایا اور گروک نے کہا کہ اسے بعد میں پتہ چلا کہ یہ "تقسیم پیدا کرنے والا جعلی ٹرول" اکاؤنٹ تھا۔
