اقوامِ متحدہ کی سلامتی کونسل کے وفد کا شام کا اولین دورہ

اقوامِ متحدہ کی سلامتی کونسل کا ایک وفد جمعرات کے روز شام پہنچا اور صدر احمد الشرع سے ملاقات کی، سرکاری میڈیا نے اطلاع دی۔ یہ دیرینہ حکمران بشار الاسد کی معزولی کی برسی سے چند روز قبل ملک کا اولین دورہ ہے۔

سرکاری خبر رساں ایجنسی سانا نے رپورٹ کیا کہ یہ وفد صبح سویرے لبنان اور شام کے درمیان واقع سرحدی گذرگاہ جدیدۃ یابوس کے ذریعے پہنچا تھا اور اس کی سول سوسائٹی کے ارکان اور "کئی شامی حکام سے ملاقات طے شدہ" ہے۔

سانا نے کہا کہ وفد نے دمشق کے شدید تباہ شدہ مضافاتی علاقے جوبر کا بھی دورہ کیا۔

سفارت کار جمعہ اور ہفتہ کو ہمسایہ ملک لبنان کا بھی دورہ کر رہے ہیں۔

جیسا کہ اقوامِ متحدہ شام میں دوبارہ مضبوطی سے اپنے قدم جمانے کے لیے کام کر رہی ہے تو سلامتی کونسل نے حال ہی میں الشرع کے خلاف پابندیاں ہٹا دی ہیں۔ یاد رہے کہ انہی کی افواج نے حزبِ اختلاف کے اُس مسلح حملے کی قیادت کی تھی جو گذشتہ سال آٹھ دسمبر کو الاسد کی معزولی کا باعث بنا تھا۔

تقریباً 14 سال کی خانہ جنگی کے بعد اقوامِ متحدہ نے کثیر النسل اور کثیر الاعتقاد ملک میں اقتدار کی جامع منتقلی پر زور دیا ہے۔

اقوامِ متحدہ کے لیے سلووینیا کے سفیر سیموئیل بوگر نے پیر کے روز ایک پریس کانفرنس میں کہا، "شام اور لبنان کا دورہ چھے سالوں میں سلامتی کونسل کا شرقِ اوسط کا پہلا باضابطہ دورہ اور شام کا اولین دورہ ہے۔"

اقوامِ متحدہ کے اعلیٰ ادارے کی گردشی صدارت اس وقت سلووینیا کے پاس ہے۔

بوگر نے کہا، یہ دورہ دونوں ممالک اور "خطے کے لیے ایک اہم وقت" پر آیا ہے۔ انہوں نے مشاہدہ کیا کہ اقتدار کی منتقلی کے لیے نئے حکام کی کوششوں کے ساتھ ساتھ لبنان میں ایک سال سے جاری اسرائیل-حزب اللہ جنگ بندی نہایت اہمیت کی حامل ہے۔

انہوں نے مزید کہا، یہ دورہ "دونوں ممالک سے حمایت و یکجہتی کا اظہار کرنے، چیلنجز کے بارے میں جاننے اور کونسل جسے دونوں ممالک میں دیکھنا چاہتی ہے، اس راہ پر پیش رفت کی غرض سے پیغام رسانی کے لیے بھی" اہم ہے۔

ان کے مشاہدے کے مطابق "اقوامِ متحدہ اور شام کے تعلقات میں ہنوز اعتماد کی کمی ہے جسے ہم اس دورے کے ذریعے دور کرنے کی کوشش کر رہے ہیں۔"

انہوں نے مزید کہا، وفد "وہ پیغامات بھی پہنچائے گا جن کی ہمیں شمولیت، دہشت گردی کے خلاف جنگ اور دیگر عناصر کے حوالے سے شام سے توقع ہے۔"

اقوامِ متحدہ کے سکریٹری جنرل انتونیو گوٹیرس کے ترجمان سٹیفن دوجارک نے منگل کو کہا، "ہمیں بہت امید ہے کہ اس دورے سے اقوامِ متحدہ اور شام کے درمیان مکالمے میں اضافہ ہو گا۔"